Препознатлив по впечатливи парчиња накит со истакната колоритност и слоевитост од детали, американскиот бренд за накит и модни додадоци Dannijo го чинат сестрите Даниел и Џоди Шнајдер. Компанијата ја започнаа во 2008 година буквално од дома, со рачно изработена колекција и прва нарачка од ланецот на луксузни стоковни куќи „Бергдорф Гудман“. Денес важат за успешен моден бренд, а накитот со потпис Dannijo го носат Бијонсе, Натали Портман, Шејлин Вудли. Нивното главно ателје се наоѓа во Њујорк и следниве фотографии илустрираат како изгледа нивното креативно работно катче.
Во нивното ателје тие го откриваат процесот на создавање на колекција, од првата инспирација, скиците, водењето сметка за тоа колку ќе тежи накитот, како ќе изгледа на тело, кои се нeговите пропорции, изборот на шарени камења и перли. „Обично колекциите ги почнуваме со една силна слика или идеја, а за оваа сезона се инспириравме од црно-белите филмови и одплеменските елементи“, вели Даниел.
Ќе се изненадите кога ќе дознаете дека сите парчиња накит се рачно изработени токму овде во њујоршкото ателје. Вообичаено употребуваат сребро, шарени камења и кристали од „Сваровски“, а овојпат дизајнираа и нова линија наречена Noir во која вметнаа хематит. Од неодамна соработуваат со компанија од Италија која прави полускапоцени камења и перли по нивен дизајн.
Од оваа сезона Dannijo продава и чанти со класична силуета и од квалитетни материјали, а во некои парчиња вметнаа и украсни елементи. „Забележавме дека е тешко да најдете чанта од луксузни детали и со украсни камчиња, па затоа одлучивме да креираме модели употребувајќи убави материјали и ткаенини. Чантата е совршена рамка за вашиот накит. Суптилните детали како кристалните детали се секогаш ценети и барани“, објаснува Џоди.
Покрај тоа што сами дизајнираат и создаваат накит Даниел и Џоди учат како сами да ја менаџираат фирмата, прават анализи за тоа кои производи успеваат на пазарот, па иако велат дека сакаат да креираат по свој ќеф, сепак им е многу важно да осетат што сакаат клиентите. Успехот треба да се сведи на спојот меѓу две клучни нешта – дизајнот и продажбата.
Нема коментари