Здружението „Заедно посилни“ со кампања за Светскиот ден на СИДА

Вирусите не дискриминираат, луѓето да!

Здружението за поддршка на луѓето што живеат со ХИВ – „Заедно посилни“ Скопје, како организација на самите лица засегнати од овој вирус, и оваа година организира активности за намалување на стигмата и дискриминацијата поврзани со ХИВ.

Кампањата ги содржи следниве елементи:

1. Концептуален перформанс / флеш-моб со цел подигнување на свеста за ХИВ, предизвикување на митовите и поттикнување поддршка кон луѓето што живеат со ХИВ. Перформансот ќе се одржи на шест локации низ главниот град (ул. Македонија, плоштад Македонија, ГТЦ, East Gate, Vero Jumbo и City Mall) каде, во определено време, без претходна најава ќе се појават на сцена учесниците во перформансот. Перформансот ќе биде изведен од 15 танчери според кореографија осмислена и режирана од Ивана Балабанова и костимографијата од Евгенија Зафировска. Во времетрање од 10 минути (на секоја локација) изведбата ќе ја пренесе пораката „Вирусите не дискриминираат, луѓето да!“. Видео-материјал од настапите ќе биде споделен преку социјалните медиуми.

3. Муралот е препознатливо обележје на урбаната уметност, кој испраќа порака на секој случаен минувач. На 1 декември, ќе биде откриен мурал на зградата на Кинотеката на Република Северна Македонија, како спомен-обележје кое со уметнички пристап ќе ги репрезентира луѓето што живеат со ХИВ преку ликот на музичарот Фреди Меркјури. Ова дело ќе ја симболизира „премолчената вистина“ и исто така ќе ја пренесува пораката „Вирусите не дискриминираат, луѓето да!“. Авторот на ова дело е Дејвид Стоилковски – Молерај.

4. Проекција на филм – веднаш по откривањето на муралот во Кинотека на Р.С. Македонија ќе биде прикажан филм за Фреди Меркјури, кој во своето сиже го разработува неговиот живот и опфаќа теми поврзани со ХИВ.

5. Вечерен настан за 1 декември. Со почеток во 21:00 часот, во Кинотеката на Северна Македонија ќе се одржи вечерен настан за одбележување на Светскиот ден на СИДА 2021, со добротворен карактер. Настанот ќе содржи музичка програма и изведба на перформансот. Покрај тоа, ќе биде промовиран новиот календар изработен од Здружението „Заедно посилни“ како дел од активностите поврзани со месецот на машко здравје. Со носечката порака „Посакуваните мажи се грижат за своето здравје секој месец во годината“ календарот се фокусира на сексуалното здравје кај мажите. Купувањето на календарот ќе биде еден од начините за донирање во фондот за поддршка на „Заедно посилни“. Средствата што ќе се соберат од добротворниот настан „Заедно посилни“ ги користи за помош на лица со ХИВ во исклучително неповолна социјална положба, преку покривање на трошоците за пат до Скопје заради здравствена контрола и подигнување терапија, како за обезбедување помош во основни прехранбени и хигиенски производи.

Активностите за одбележување на Светскиот ден на СИДА 2021 г. се овозможени со поддршката од Министерството за здравство – Програмата за заштита на населението од ХИВ-инфекција за 2021 г., програмата Цивика Мобилитас и Фондот за население на Обединетите нации – УНФПА.