Завршницата на секое доделување на филмските награди „Оскар“ е во знакот на прогласување за најдобар филм како главна награда, на овогодинешното доделување во финишот беше направена збрка и наместо победникот „Месечевата светлина“ (Moonlight), презентерите Ворен Бити и Феј Данавеј направија грешка, ја прочитаа информацијата од погрешен плик и објавија дека „Ла ла ленд“ е најдобар филм. Откако тимот на „Ла ла ленд“ се качи на сцената да ја прими златната статуетка и започна да се заблагодарува, воочено е дека е направена забуна и „Месечевата светлина“ е прогласен за најдобар филм на 89-тото доделување на „Оскар“.
Сето ова предизвика непријатност кај тимот на „Ла ла ленд“ кој оддеднаш се најде на сцена со вистинскиот победник, а по целата збрка и мешаница продуцентот Џордан Хорвиц откако го покажа вистинскиот плик со името на вистинскиот победник, ја предаде наградата на творците на „Месечевата светлина“. Според американските медиуми ова е прв пат во историјата на „Оскарите“ да се направи грешка при читањето на победникот во оваа категорија.
Тимот на Moonlight, продуцентите Џереми Клајнер и Адел Романски со режисерот Бери Џенкинс
„Месечевата светлина“, приказна за растењето и справувањето со светот на едно младо црно момче од Мајами, е првиот филм од независната продукција што е добитник на главната награда на „Оскар“, а еден од актерите на филмот, Махершала Али, е првиот Муслиман прогласен за најдобар во категоријата машка споредна улога.
Махершала Али, Ема Стоун, Виола Дејвис и Кејси Афлек се најдобрите актери на „Оскар 2017“
Филмот „Ла ла ленд“ кој со 14 номинации се сметаше за најголем фаворит на овогодинешните „Оскари“, во конечницата освои 6 статуетки, од кои Демјан Шазел доби награда за најдобар режисер, со што стана најмладиот режисер што победил во оваа категорија, а Ема Стоун е најдобра актерка за улогата во овој мјузикл. Во категоријата за најдобар актер победи контроверзниот Кејси Афлек за „Манчестер покрај море“. Инаку Афлек не е толку омилен меѓу публиката поради судењето за наводни повеќекратни сексуални напади. Виола Дејвис е најдобра актерка во споредна улога за „Огради“. Најдобар филм од неанглиско говорно подрачје е иранскиот „Продавачот“ на Асгар Фархади, кој не се појави на доделувањето на „Оскарите“ поради забраната на Доналд Трамп за влез на Муслимани во САД, а повеќето филмаџии од Холивуд пратија повеќе политички пораки со критика на работењето на актуелниот американски претседател.
Ема Стоун најдобра актерка за улогата во „Ла ла ленд“
Кејси Афлек доби „Оскар“ за улогата во „Манчестер покрај море“
Нема коментари