Бразилската модна консултантна Кристина Кордула неодамна се омажи за својот долгогодишен партнер Фредерик Касан на италијанскиот остров Капри и од фотографиите од свадбата можеме да забележиме многу романтика, насмеани лица и три сосема неочекувани свадбени изгледи на невестата. За време на свадбениот викенд таа се појави во три различни стајлинзи, а за главната свадбената веселба избра жолт фустан од Џамбатиста Вали. Нејзините комбинации се ведри, невообичаени и сосема соодветни за летна свадба. Да одиме со ред…
Прво, Кристина облече краток бел фустан со цветен вез, впечатлив ѓердан и имаше тул здолниште прикачено на задниот дел. Изгледот го комплетира со еспадрили. Фустанот е дел од колекцијата на висока мода на Џамбатиста Вали, прикажана во јануари на почетокот од годинава.
Втората веселба беше во стилот на забава на плажа и за таа цел Кристина облече плетена креациија во црвена и розова боја, во бохо стил и со реси, дополнета со сламен шешир и ниски сандали.
За главната веселба на оваа екстравагантна свадба невестата избра совршен летен фустан – тоалета во боја на невен со спуштени бауш ракави и елегантно драпиран долен дел, повторно креација на Вали. Кристина изгледот го комплетира со брош околу половината, деликатен накит и сребрени сандали од Џими Чу.
Зошто жолта венчаница!? „Го видов фустанот на ревија на неделата на висока мода, но побарав да биде во жолта боја. Сакав венчаницата да ми биде жолта, бидејќи тоа е бојата Бразил“, објасни Кристина, некогашна манекенка, денес модна консултантка и водителка на модно шоу на француска телевизија.
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете линк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари