Амал Аламудин ја пробува венчаницата во ателјето на Оскар де ла Рента во присуство на главниот мајстор Рафаело Лардо (Фото: Ени Лејбовиц)
Весниците и магазините не престануваат да пишуваат за свадбата на холивудката ѕвезда Џорџ Клуни со успешната британско-либанска адвокатка за човекови права Амал Аламудин, а денес беа откриени насловните страници на неделниците People и Hello кои го добија ексклузивното право да ги објават фотографиите од нивната венчавка во Венеција. Насловните исто така откриваат што носеше брачната двојката на својата свадба – тој костум од Џорџо Армани, а таа романтична венчаница од американскиот дизајнер Оскар де ла Рента. Американски Vogue имаше можност да присуствува на последниот фитинг на Амал во њујоршкото ателје на де ла Рента, додека ја пробува венчаницата од тул во боја на слонова коска, украсена со мониста и апликации од шантили-тантела. Амал признава дека сакала свадба од бајките на која ќе носи фустан од соништата.
„Џорџ и јас посакувавме свадба што ќе биде елегантна и романтична, и не можев да замислам некој поспособен од Оскар да го „фати“ тоа расположение во фустан. Средбата со него го направи процесот на дизајнирање уште помагичен, тој е толку топол и голем џентлмен“, изјави Амал за соработката со дизајнерот. Соработката почнала уште во јули кога Амал го посетила Оскар во неговата канцеларија во Њујорк, а крајниот резултат е раскошен и романтичен фустан од тул и тантела, со спуштени прерамки и нежно корсетиран горен дел, украсен со луксузна мониста и кристали. „Ова е најважниот фустан во животот на една жена. Секоја девојка од секој профил од животот сонува за тој посебен фустан и јас се обидов тој сон да и’ го претворам во реалност. Со Амал гледавме многу вечерните и венчални фустани, и разговаравме за она што таа го сака. Тоа ми даде идеја за она каков фустан посака“, изјави Оскар.
Нема коментари