Препознатлива од модните писти и фотосесиите во списанијата, манекенкатата Ангелина Блажеска, вљубеничка во фитнесот и вежбањето, дојде до идеја да ја креира македонската мобилна апликација FitKit – платформа која ви овозможува да вежбате што сакате, кога сакате и каде сакате низ Скопје со само една месечна членарина. Лансирана деновиве, ова е прва домашна апликација која овозможува организирање на вашата фитнес програма во најдобрите фитнес и спортски центри, засега само во Скопје, а е достапна за Android и iOS. Да, FitKit навистина претставува 1 решение, многу фит можности. Во разговор на Stylist.mk Ангелина ни ја објасни идејата и функцијата на FitKit, од што беше поттикната и прати позитивна порака за спортско/вежбачко активирање – нема повеќе забушавање, сега постои и апликација за полесно, поекономично, позабавно и многу флексибилност во планирањето на вежбањето.
-Идејата произлезе од тоа што јас лично сум вежбач кој сака различни активности. Сакам сè да пробам и после долго вежбање различни активности насекаде низ Скопје се пронајдов во јогата и фитнесот на шипка… Потоа само тие две активности не ми беа доволни, па дополнително сакав да одам на класичен фитнес и кога ја направив пресметката излезе дека многу пари ми одат на членарини, а од друга страна никогаш не ги искористував максимално тренинзите што ги плаќав. Потоа многу случајно налетав на статија на интернет која беше за некоја девојка која ја развила ClassPass платформата во Америка и на некој начин го решила овој мој конкретен проблем, но далеку и недостапно од мене 
Од идеја до реализација, како течеше создавањето на апликацијата и кој е тимот со кога соработуваше?
-Од кога се роди идејата следуваше еден период на истражување, како функционира тоа во светот, што би можело да се преслика за нашиот пазар и дали воопшто има заинтересираност за такво нешто. Полека ја формирав и таргет групата на корисници, па ја мислев подетално идејата, се консултирав со поискусни од мене за сите аспекти од проектот кои ги опфаќа идејата од почеток до крај и така се формираше сликата за тоа што точно ќе се создаде. Работев со многу искусен тим на програмери кои точно ме разбраа што ми треба и беспрекорно си ја завршија работата. Од друга страна од самиот почеток соработував со Кајгана медиа кои многу ми помогнаа во формирањето на брендот и тие го смислија името ФитКит.
Објасни ни подобро што претставува FitKit? Како функционира и што е целта? Откако корисниците ќе ја симнат, што понатаму?
-FitKit претставува мобилна апликација. Наменета е за активни луѓе на кои ќе им биде прибор за вежбање сместен во нивниот телефон. Функционира на следниов принцип: еден корисник ја симнува од App Store или Google Play, си прави профил и добива увид во термини и локации за вежбање најразлични активности низ Скопје. Има можност онлајн да си купи 16 тренинзи месечно за 1800 денари и истите да ги искористи било каде и било кога со кликање и пријавување на термините излистани на тајмлајнот во апликацијата. Кога ќе се пријави за даден термин за вежбање, апликацијата генерира код кој треба само да се покаже при искористување. Нуди голема флексибилност како во активности, така и временска што е многу погодно за луѓе кои се зафатени и тешко се придржуваат до стандардот „понеделник, среда и петок од 18 часот“ тип на вежбања…
Колку е важно да се тренира и спортува и дали сметаш дека оваа апликација ќе ги инспирира оние што не вежбаат да почнат со фитнес или некоја рекреативна активност?
-Многу е важно да се тренира и практикува спорт, бидејќи така телото се одржува здраво и силно. Нема потреба да напоменуваме за бенефициите од вежбањето, ги има премногу. Апликацијата FitKit очекувам не само да ги инспирира да почнат со вежбање, туку и да ги мотивира сите кои ќе ја користат да пронајдат што е можно повеќе активности што им се допаѓаат и да се заразат како што сум заразена и јас. Вежбањето со FitKit буквално ги елиминира сите можни изговори секојдневно што си ги даваме за да прескокнеме тренинг од типот на: не знам каде да вежбам, немам време, ми се здосадува исто па исто, ми пропаѓаат чланарините и сите слични.
Апликацијата е мошне нова, имаш ли информација колку корисници веќе има и кои вежби се најголем хит засега?
-На апликацијата во првите 48 часа од пуштањето онлајн имаше регистрирано 485 профили, а таа бројка секојдневно расте. Сè уште некоја статистика за тоа кои вежби се најпопуларни не можам да направам додека не помине барем еден месец, но очекувам најмногу да се вежба класичен фитнес во поголемите фитнес центри во комбинација со придружни активности како функционални тренинзи или пливање. Вклучени се неколку категории на активности:2 фитнес, функционални тренинзи, пилатес, аеробик, пливање, танцување и боречки вештини и засега имаме околу 20 различни локации. Секојдневно работиме на додавање нови термини и збогатување на понудата за да се покрие и територијално поголем дел од Скопје.
Која е твојата фитнес рутина, и колку вежбањето е составен дел од твојот животен стил?
-Мојата фитнес рутина се состои од редовно релаксирање со јога, тренирање фитнес на шипка, понекогаш фитнес и обавезно трчање на кеј кога е убаво времето. Без вежбањето се чувствувам многу лошо, немоќно и психолошки опаѓам, така што и кога сум најмрзлива знам да се убедам да станам и да истренирам.
Бидејќи се занимаваш и со манекенство, колку е важно постојано да бидеш во топ форма?
-Манекенството ми е хоби и искрено никогаш не сум чувствувала притисок да изгледам слабо и совршено. Секако кога имам некои посериозни ангажмани посветувам повеќе време на тренинзи, но независно од манекенството се одржувам во топ форма постојано, а ангажманите само повеќе ме мотивираат да не забушавам
Модната публика те препознава како манекенка со неколкугодишно искуство, кои се според тебе најголемите твои успеси на ова поле, во која фаза е манекенството присутно во твојот живот во овој момент и колку ќе му се посветиш во иднина
-Секогаш на манекенството сум гледала како на занимација и дружење со луѓе кои многу ги сакам и веќе ми се добри пријатели. Некако изминативе 10 години постојано бев присутна на таа сцена и ќе продолжам да бидам сè додека имам време за тоа. Мислам дека тоа ќе биде се помалку, бидејќи покрај манекенството и FitKit, најсериозно сум посветена на инженерството. Јас сум дипломиран машински инженер од пред две години и работам на сериозни проекти за постојано подобрување во индустријата по принцип на имплементација на јапонски методологии и фокусот во иднина ќе ми биде на тоа.
Tвој совет за тоа во каква облека треба да се оди на тренинг и вежбање?
-Мојот единствен совет е: соодветна. Соодветна значи да биде спортска, да се чувствувате удобно и да биде според стандардите за спортот кој го практикувате за да не настанат повреди. Кога целта ви се лајкови за инста или фејсбук, слободно нашминкајте се 
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете линк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари