Една од најпрепознатливите и најуспешните македонски манекенки Елена Гугоска црта од детството, а пролетва изврши цртачко освојување на најзначајните европски градови кое го документираше на својот профил на Инстаграм. Нејзината спонатана иницијатива да направи цртежи на одредени европски знаменитости се претвори во #projectDrawEurope, a проектот од црно-бели илустрации повеќето во минималистички манир ќе биде изложен на претстојното издание на „Паратисима Скопје“. Елена за Stylist.mk раскажува за цртањето, за илустрациите од нејзиниот проект и откри повеќе за изложбата.
Берлин
Оние што те следат на социјалните мрежи периодов можеа да видат цртежи на познати туристички дестинации фотографирани токму покрај некоја знаменитост или амбиент низ европските градови. Како почна оваа цртачка приказна низ Европа и како ја реализираше? Каде сè црташе и фотографираше?
-Искрена да бидам целата приказна за #projectDrawEurope се скрои сосема спонтано, сама по себе. Само неколку дена пред моето заминување на пат низ Европа, кога се правеа последните планови, претпоставувам понесена од еуфоријаата за сите градови што ќе ги посетам се роди една мала идеја како да ги сочувам сеќавањата од истите. Тотално без било каков притисок дека истата таа идеја ќе се развие во нешто поголемо. Си ветив, лично за своја сатисфакција дека ќе пробам да нацртам по некоја илустрација за секое место кое ќе го посетам. Независно дали ќе станува збор за некоја знаменитост, амбиент кој ќе ми се допадне или пак емоција што ќе ми ја предизвина некој град. Важно беше само да биде „нешто” по кое јас лично ќе го паметам секој град што ќе го посетам. Цртам од детство, и што се вика сакав „да се пробам”да видам до каде ми се способностите и до каде ми е развиена креативноста, па дури и кога тоа е под притисок. Велам притисок, бидејќи стануваше збор за навистина збиен распоред, за 20-тина дена успеав да посетам 6 држави и некаде 10-тина градови. Цртав во Прага, Берлин, Амстердам, Париз, Ница, Монте Карло, Барселона, Лорет де Мар, Рим и Венеција.
Дали црташe во моментот додека си на одредена локација или имаше претходно направена скица? Како оди тоа со инспирација?
-На патувањето тргнав со делумно осмислен концепт во мојата глава за тоа како би сакала да изгледаат цртежите, поготово за оние градови кои имаат знаменитости кои на сите ни се добро познати. Илустрацијата со која го започнав проектот и гласи Off We Go е создадена ден пред самото тргање, останатото се одвиваше на самите локации. Како и што очекував, инспирација воошто не беше тешко да се најде, секој од градовите е приказна сам по себе. Нудеа толку многу што понекогаш ми беше тешко да се сконцентрирам само на едно нешто. По завршување со цртање на секоја илустрација ја фотографирав на местото кое ме инспирирало за истата. Во едната рака Sketchbook-от во другата мобилниот и така се создадоа фотографиите за #projectDrawEurope (искористете го хаштагот и ѕирнете ги на инстаграм), но некогаш две раце не беа доволни, па верно ми помагаше другарката што патуваше со мене.
Амстердам
Завршницата на #prоjectDrawEurope ќе ја видиме изложена. Каде и кога?
-Токму така. На моја многу голема радост, особено затоа што за првпат ќе имам изложени дела, пред неколку дена го најавив моето учество на Paratissima Skopje. Станува збор за третото издание на Интернационалниот саем за современа уметност кој ќе се одржува викендов што ни претстои во просториите на Младинскиот културен центар (МКЦ) во Скопје, поточно на 10-ти, 11-ти и 12-ти јуни. Програмата можете да ја погледнете на http://paratissimaskopje.mk/programa/ и со големо задоволство ве чекаме да не посетите.
Од кога црташ и дали имаш сработено и некои други проекти?
-Цртањето ми е платонска љубов од детство и еве после толку години ништо се нема променето во тој поглед и сигурна сум дека така и ќе остане. Последниот проект на кој што работев изминатиов период беше цртање на илустрацијата на портретот на нашиот познат пејач Дарио Панковски, која подоцна на мое големо задоволство се најде на каверот на неговиот седми студиски албум „Ако силно посакам”.
Париз
Кои обврски со манекенството беа актуелни и што друго те окупираше во периодов?
-Покрај мојата стандардната ангажираност околу моделингот како посебен настан би го издвоила фотографирањето за насловната страница на модниот магазин Unique. Голема чест и привилегија ми беше што ме поканија да бидам првиот македонски модел кој што се појави на нивната насловна страница и да соработувам со одличен тим на професионалци.
Во погледе на останатите обврски кои ме окупираат периодов, поголемиот дел од нив се поврзани со подготовна на мојот дипломски труд. Многу наскоро ќе бидам дипломимран студент на студиската програма Менаџмент на Економскиот факултет при универзитетот „Св.Кирил и Методиј”.
Прага
Илустрација цртана на таблет
Венеција
Нема коментари