Креативката Елена Поповска своето Ателје Jewelry My Precious го отворила спонтано во 2013 година, само по себе после повеќегодишното запознавање и усовршување на техниките кои ја воодушевувале уште од мали нозе. Иако нејзината приказна за изработка на накит започнала случајно со изучувањето на техниката за плетење на традиционалниот македонски ќустек, а потоа и филигран, чувствувала дека тоа е патот по кој сакала да оди за да може целосно да се изрази. Потребата пак да биде во секое време достапна за нејзините клиенти била пресудна да го отвори ателјето, како место каде тие ќе можат да ги погледнат нејзините креации, да можат да си одберат нешто за себе или пак, за своите блиски, но и да разговараат и заеднички да ги создава таа креациите кои на нив најмногу им се допаѓаат. За нејзината работа и процесот на креација разговаравме со Елена во нејзиното ателје.
Што сѐ може да се најде во Ателјето Мај Прешс?
- Во ателјето можат да се најдат различни производи кои во основа можат да се поделат на неколку вида на накит како привезоци, брошеви, обетки, прстени, алки, ланчиња, комплети. Тие можат да бидат дел од различни колекции, но за сите е исто што се рачно изработени. Во зависност од колекцијата, тие можат да бидат од сребро. месинг, бакар, монистра, во комбинација со полускапоцени камења, бисери, кристали. Во основа сите мои производи се инспирирани од природата, па така најчесто можат да се сретнат мотивите цвет, пеперутка, крило, лист. Ја сакам и почитувам нашата традиција, но моделите кои ги содржат традиционалните елементи, на пример галичката копча, сакам да ги претставам на еден поинаков, помодерен начин.
Каков е еден процес на една рачна изработка?
- Се зависи од тоа во која техника е изработен производот. Ако е од сребро, процесот започнува со рачна подготовка на репро материјалот во форма и големина која е потребна за производот. Ако станува збор за филигрански производ , сама ја подготвувам жицата со нејзино извлекување, а по потреба и сукање и исчукување на истата, за да ги добијам потребните димензии кои ќе ги користам за производот кој сум го замислила. Потоа оди изработка на надворешна и внатрешна конструкција на производот, негово пополнување со ситните елементи, лепење, оформување, додавање на дополнителните делови, се разбира и полирање како најзначаен момент за да се добие беспрекорен изглед. Нормално во изработувањето на филигранот процесот е многу покомплексен со изведување на повеќе операции, но сепак овие се едни од најважните без кои не е возможно да се изработи производот. Кај производите кои се дел од колекцијата „Белези од природата“, најпрво ја пронаоѓам точната форма на пеперутката или пак некој друг вид кој го изработуваме. Според тие контури рачно ја сечам бакарната плоча, која потоа се оформува за да се постигне природниот изглед на видот. Во зависност од тоа што е крајниот производ ги лепам сребрени елементи за брош, привезок, прстен и сл. Најважно за оваа колекција е рачното цртање на шарите на видот со акрилни бои, кое го прави мојот син Матеј Поповски, така да може слободно да се каже дека ова е наша заедничка колекција.
Кои се предизвиците сиве овие години, колку ги слушате барањата на купувачите?
- Предизвиците од секогаш биле да можеме да создадеме свесност за тоа колку време и труд е потребно да се изработи рачно еден производ. За жал брзото темпо на живот и инстант производи, особено многу достапната бижутерија, некако доведоа до тоа да се мисли дека вредноста на изработките треба да се многу мали. За среќа се повеќе клиенти се свесни дека можат да добијат производи кои се направени за нив, според нивните барања и желби, и постепено се менува перцепцијата дека почнува да се цени нашата работа.
Голем дел од изработките се настанати и како резултат на исполнувањата на барањата на клиентите, а потоа истите често ги модифицирам спрема моите замисли, и се создаваат дела на кои сум особено горда.
Што е она што ве прави различни од останатите?
- Секој е различен на сопствен начин и тоа е убавината кога сме креативни. Мислам дека желбата да експериментирам со нови техники и нивно комбинирање во создавањето на производите е нешто по кое сум препознатлива. Исто така и изработувањето на производите кои во себе ја имаат природата како основен мотив. Без разлика дали се тоа орхидеите, ружите или пак пеперугите. Сакам кога од сребрената жица се добива филигранска орхидеа, или пак кога пеперуга од колекцијата Белези од природата мислите дека штотуку ви слетала на вас.
На кој начин ги креирате колекциите?
- Секогаш пред изработување на некоја колекција прво ослушкувам што моето внатрешно јас сака да каже. Дали е тоа да ја славиме природата која е околу нас, или пак да обрнеме внимание на нешто што можеби постепено го забораваме. Потоа правам истражувања на таа тема, а на крај одлучувам што се ќе биде дел во таа колекција. Во основа ги правам глобалните нацрти на колекцијата – број и што се таа ќе содржи, но крајниот резултат ни самата не го знам. Тој постепено се оформува при самиот процес на изработка, зашто при самото изработување му дозволувам и самиот материјал да ми каже во кој правец да одам за да го постигнам ефектот што сум го замислила.
Колку ви помогна во работата проектот на ЦУП како женски бизнис за време на пандемијата?
- Во периодот на Ковид-кризата, јас како и многу мои колеги се соочивме со голем проблем околу работата, особено во финансискиот дел. Идеи и изработки и понатака постоеја, но некако за многу брзо време многу работи се сменија, а ние не можевме да се фокусираме да го најдеме најповолното решение во кој правец треба да го водиме нашиот бизнис.
Со помош на проектот „Мерки за зајакнување на женски бизниси по Ковид-19“ е спроведен од Центар за управување со промени – ЦУП, а поддржан од Balkan Trust for Democracy, не само околу водењето на бизнисот, во однос на препораките како да спрема бизнис плановите можеме нашите потенцијали да ги претвориме во наши предности, туку ни овозможија и обуки за понатамошно развивање и растење од технички аспект, овозможувајќи ни и дополнителни обуки за учење на нови техники во работата.
Не смеам да го испуштам и фактот дека со нивна помош ќе научиме и како најправилно ќе треба да се насочиме кон маркетингот, кој е можеби еден од најзначајните фактори покрај високиот квалитет на производите, за успешен развој на една фирма.
Кои се вашите идни планови за 2022 година?
- Во текот на 2022 година имам неколку плана кои би сакала да ги остварам. Најпрво е изработка на веб страна, бидејќи мораме да ги следиме трендовите околу нас. Таа е замислена да биде место каде што ќе можат да се видат и добијат информации за најуспешните колекции, но исто така ќе може да се купи и некое парче од нив. Во првата половина на оваа година имам замисла за создавање на уште две колекции во соработка со мојот син. Едната ќе биде минималистичка, унисекс колекција, замислена за да ги освои симпатиите на помладата публика. А втората, па и таа доста ќе се разликува од сето тоа до сега што го имам работено.
Нема коментари