Статуетката за најдобра колекција специјално за ова издание на „Stylist.mk наградите“ ја направи архитектата и дизајнерка на накит Александра Шекутковска. Наградата за најнадежен дизајнер ја создаде Јасмина Главинче, која работи под брендот за накит WIZART, а уникатното признание за најдобра манекенка го изработи Глигор Кузмановски
Александра Шекутковска
Александра Шекутковска - дизајн на статуетката за најдобра колекција на наградите на Stylist.mk
Младата архитектка и дизајнерка на накит од плексиглас, позната по својот бренд Laser Cut Design Laboratory, Александра Шекутковска, за приказната зад статуетката за најдобра колекција на наградите на Stylist.mk вели:
-При изработката на статуетката инспирира концептот дека процесот е некогаш поважен од резултатот. Процесот на материјализирање на идејата, она што е во позадина на создаденото дело. Фигурата претставува обединување на процесот и дизајн алатките. Дизајн алатките може да се сметаат и за ретроактивен процес, можат да се аплицираат и по завршетокот на одреден предлог за дизајн. Создавањето на такви алатки е важно за да може да се кондензира есенцијата на концептот во разбирлива идеја. Секој од пресеците содржи дијаграм кој последователно го раскажува процесот од невидливото до целината. Во последниов период во студиото се трудам да користам природни материјали. Дијаграмите се изработени на пресеци од дрво, ласерски исечени, врамени со централно носечко парче од плексиглас. Предложениот дизајн во себе ја носи мојата сопствена идеја за тоа што треба да претставува најдобрата колекција, во нејзе е врамен процесот на раѓање и развиток. Нејзинот почеток и нејзинот (бес)крај.
Александра Шекутковска има дипломирано на Архитектонскиот факултет во Скопје. Своето искуство го гради во неколку архитектонски студија во Скопје и Цирих. Во 2009 година ја основа Laser Cut Design Laboratory, концептуално дизајн студио за истражување и експерименти во современиот дизајн. Делата се изложени на повеќе индивидуални и групни изложби помеѓу дисциплините архитектура, уметност и дизајн. Во септември 2012 ги завршува напредните мастер студии за Урбан дизајн во територии во развој на ETH Zurich. Во текот на програмата работи на проекти за урбан развиток на Рио и Сао Паоло. Дел е од тимот кој ја изработува публикацијата Cidade de Deus: Working with informalised mass housing, добитник на Книга годината во категорија урбани студии ДАМ награда. Во моментов работи на проекти од областа на архитектурата и урбанизмот, со периодични истражувачки и продуцирани дизајн проекти.
Јасмина Главинче
Јасмина Главинче – дизајн на статуетката за најдобар млад дизајнер на наградите на Stylist.mk
Основен двигател во процесот на реализација на секој мој дизајн за креативката Јасмина Главинче, е предизвикот, особено кога се работи за нешто што го прави за прв пат.
-Отсекогаш сум сакала да експериментирам, да испробувам нови техники и материјали. Оваа прилика, прва од ваков тип, ми го овозможи баш тоа, од „непознато“ да создадам нешто допирливо и функционално. Во процесот на истражување и развојот на многуте идеи кои ми се вртеа во глава, сфатив дека една од најважните работи кои треба да ги знае еден млад моден креатор е кроењето. Веднаш се сетив на „Бурдите“ од мајка ми и додатокот од огромно парче хартија со шнитови/ шеми за кроење. Следниот чекор беше, како од тоа парче хартија да направам статуета? Како да се симплифицира идејата и како да го доловам графичкиот приказ на шемите. За материјалот/плексигласот се одлучив највеќе поради неговата едноставност и практичност, а го искомбинирав со конец за да ја „омекне“ неговата крутост и поблиску да се долови идејата. Бев сигурна дека на добитникот на наградата ќе му е многу драга и ќе сака да ја чува засекогаш во својот дом, па дури и постаментот го направив монтажно, за да може лесно да ја транспортира кога ќе стане светски познат.
Јасмина Главинче, која е родена во Охрид, има дипломирано на Факултетот за историја на уметност и археологија, а зад себе има работно искуство како туристички водич, дизајнер на накит и сувенири, и работа како сценограф на филмски сетови. Таа е еколошки освестена и мултидисциплинарна дизајнерка. Во 2011 година го основа своето креативно студио WIZART со цел да ги спои световите на урбаниот живот, уметноста и природата.WIZART е занаетчиска работилница која се занимава со производство на еко-пријателска, садлива хартија. Паралелно изработува накит од повеќе материјали и во различно техники: хартија во комбинација со жица, дрво, плексиглас, кожа, глина и друго. Редовно учествува на изложбите на накит, креативните работилници и на базарите за рачна изработка. Последен во низата ангажмани беше изработката на обвивката за компилацијата „Некои девојки“ на „Ако никој не свири“ и МКЦ.
Глигор Кузмановски
Глигор Кузмановски – дизајн на статуетката за најдобра манекенка на наградите на Stylist.mk
Дизајнерот на накит од дрво, Глигор Кузмановски, за искуството и инспирацијата при изработката на статуетката за најдобра манекенка на наградите на Stylist.mk вели:
- При дизајнирањето на моите креации приказната што ми ја раскажуваат клиентите му ја шепнувам на дрвото. Така, беше и кога ме поканија од Stylist.mk да изработам една од статуетките за модните награди. Бидејќи најчесто изработувам накит, и сум постојано во контакт со дамите некако најприродно ми беше да ја создадам статуетката за најдобар модел. Дадов свое видување на женската убавина, претставувајќи ја преку еден од најубавите делови на женското тело – нозете. Уникатот го изработив од орев со техника на брусење. Ова е прва статуетка наменета за некакви награди што се создава во моето ателје, и за мене беше интересно и инспиративно иксуство.
Глигор Кузмановски има дипломирано на Факултетот за историја на уметност и археологија. Изминатите четири години се занимава со дизајн на накит од дрво, а има изработено и неколку слики. Досега има соработувано со познатата дизајнерка Росица Мршиќ на две нејзини колекции. Изработи уникатни ѓердани и брошеви инспирирани од природата за колекцијата есен-зима 2011/12, како и накит (обетки, прстени, алки и ѓердани) мотивиран од африканските племиња за линијата пролет-лето 2012 која беше презентирана на Модниот викенд-Скопје. Има учествувано на повеќе базари, групни изложби и хуманитарни настани.
Нема коментари