Дизајнерот Мите Занов има нова колекција Dunes инспирирана од пустината, во географско, но и со метафорично значење, па соодветно ја претставува преку фотосесија направена во пустински амбиент, во која трите манекенки Ангела Младеноска, Соња Граздани и Магдалена Георгиевска позираат пред објективот на Мартин Трајановски.
-Пустинските дини, создадени со напластување на песок, разнесен со помош на силата и моќта на ветерот, симболично за мене ги претставуваат сите предизвици што ги носи животот на секоја индивидуа… Убави и среќни моменти, подеми и падови, искачување и исполнување на целите, разочарување од самите себеси и од другите, животни приказни, секоја сама по себе уникатна и посебна на свој начин. Пустината, што се смета за еден вид изолиран простор на Земјата, простор без вегетација, со мал процент на вода, и место на Земјата каде условите за живот се многу оскудни или воопшто ги нема, метафорично е поврзана со ситуацијата и состојбата во која се наоѓа моментално цел свет. Изолирани, затворени, без љубов и со изгубена надеж… Но сепак со борба, единство и позитивна енергија. Но, пустината си има своја волшебна убавина, исто како и секој човек на оваа планета – вели дизајнерот за појдовната инспирација и за размислите кои влијаеле на обликувањето на облеката.
Тој наведува дека од овие размисли доаа и главната порака на колекцијата – дека без разлика на сè, без разлика на тоа што и да ви се случува во животот, колку и да се чувствувате осамено, изолирано, несакано, разочарано, без срам треба да прифатите тоа што сте…
-Дајте си сами на себе љубов, почитувајте се, сакајте се и не заборавајте, секој од вас е посебен и волшебен на свој начин. Себе љубовта, на оригинален начин е прикажана преку кроевите на креациите со техника која за мене претставуваше нов вид на изработка и експериментирање. Односно, воведов интересен начин на спојување на материјалите, преку спирална техника, која може да се забележи во неколку модели и со која се прикажува обвиткување на телото, себе-гушкање, допирање и галење… Со оваа техника, значително да се напомене и дека нема никаков отпад при изработка на моделите, односно преку zero waste на самите материјали, со мали, но сигурни чекори, се обидов свесно да допринесам во заштитата на планетата Земја, помало загадување за почист живот.
Материјалите во колекцијата, се внимателно одбрани, меѓу кои преовладуваат лесни и лелеави материјали, погодни за летна сезона, како памук, вискоза, свила и шифон. Палетата на бои е совршен приказ на пустината – земјени тонови, крем нијанси, загасити сиви, зелени, жолти и розеви тонови, како и контраст на црна и бела боја. Во колекцијата е застапен различен асортиман на дизајни и модни парчиња, кратки и долги панталони, кратки и миди фустани, сакоа, здолништа, комбинезони, блузи, а исто така целосната слика ја надополнува и рачно изработен накит во златна боја, аксесоари кои нагласуваат посебен дел од телото.
Погледнете го едиторијаот за новата колекција на Занов.
Фотографија: Мартин Трајановски/ Модели: Ангела Младеноска, Соња Граздани, Магдалена Георгиевска (ModelsIn, ZOA Models) / Шминка: Миа Арабаџиева / Фризура: Елена Николовска / Асистенти: Димитар Бабков, Тони Петрушевски/ Накит: ZANOV / Чевли: Victor Chevignon / Special thanks: Емил Поповски
Нема коментари