Британскиот совет во Македонија во соработка со Факултетот за арт и дизајн при Европскиот универзитет – Република Македонија, Музејот на Македонија и Моден викенд -Скопје подготви публикација која е резултатот на проектот „Модата и културното наследство“ и истоимените работилница и изложба. Уредници на публикацијата се Гордана Вренцоска и Жарко Конески.
-Со овие партнери споделивме заедничка цел – поддршка на потенцијалот на млади креативци, поголем интерес на модните дизајнери и општата публика за богатото културно наследство и презентација на креативната синергија помеѓу современата мода и традиционалните шари, ткаенини и облеки преку изложба наменета за широката публика. Модата, развојот на културните институции и промоција на различни креативни сектори се дел од поддршката која ја даваме во поттикнувањето и развојот на креативната економија во Македонија и светот. Низ примерот на посочената соработка се дава преглед на капацитетот на креативните индустрии кои може да понудат развој, соработка, вмрежување и културен и економски напредок на едно креативно и иновативно општество -се вели во објавата на Британскиот совет.
Проектот ги опфаќа поглавјата „Модата и културното наследство“, воведен збор (Елеонора Запрова, Британски совет во Македонија); „Модата како производ на економските состојби во општеството“ (проф.д-р Лидија Наумовска, ЕУРМ); „Културното наследство како основа за уметнички модни концепти“ (проф. д-р Стојанка Манева – Чупоска – Јана, ЕУРМ); „Огнот на традицијата“ (Јасемин Назим, НУ Музеј на Македонија); „Институционалната соработка помеѓу ЕУРМ Скопје и НУ Музеј на Македонија, како дел од стратегискиот менаџмент на ЕУРМ“ (доц. д-р Елизабета Стамевска, ЕУРМ); „Дизајнот на модна изложба како предизвик за дизајнерите на ентериер“ (доц. м-р Јовица Мијалковиќ, ЕУРМ); „Интердисциплинарниот пристап во поврзувањето на модата и културното наследство“ (проф. д-р Гордана Вренцоска, ЕУРМ).
Факултетот за арт и дизајн при Европскиот универзитет – Република Македонија и неговиот тим наставници и студенти се ангажираше во водење и менторирање на студентите, подготовката на изложбата и составување на публикацијата. Раководството и стручните лица од Музејот на Македонија овозможија стручни, технички и просторни услови за работа и направија извонреден избор од богатата збирка која послужи како основа за креативната креација и модната поставка. Моден викенд Скопје го вклопи овој проект и придружната изложба во концепцијата на нивното модно издание есен/зима 2015-16.
Публикацијата објавена во електронска верзија може да ја преземете или погледнете на веб-страницата britishcouncil.mk.
Нема коментари