Десет женски и една машка комбинација од колекцијата „Француска елеганција“ на Shaleva Couture беа прикажани вчеравечер на последната ревија на овосезенскиот Моден викенд-Скопје. Зад Shaleva Couture стои Македонката Душица Петит која подолго време живее во Париз и таму дипломира на одделот за висока мода на познатото париско школо Есмод, а нејзината визија за тоа што е француска елеганција прикажа во својата нова колекција. Инспирација најде во селектирани елементи од барок стилот, но и во естетиката на француските модни куќи како „Балман“, „Диор“ и „Сен Лоран“.
-Според мене француска елеганција е мода која што прикажува свечени тоалети и која што е препознатлива по „la petite robe noire“ (мал црн фустан) – ќе рече Душица и додава дека и Македонките ги гледа облечени во француска елеганција, и според неа голем дел од жените и девојките обожаваат свечени тоалети.
На коктел забави, на гала настани, на вечера во ресторан и во други пригоди може да се носат креациите од нејзината нова колекција. Доминираат црната боја и верзии на малиот црн фустан, а колекцијата содржи долги и миди креации, комплети од панталони и вчечатлив горен дел, елеци и палта во црно-златни ткаенини, а изгледот е коплетиран со влечки украсени со светкави камчиња. Користи материјали како тантела, памук, кожа, а главна карактеристика во работата на дизајнерката е рачната изработка и созадавањето на нови ткаенини и текстури. Манекенките носеа впечатливи обетки од македонската компанија Duki Daso. Покрај женските дизајнерката во колекцијата претстави и една машка силуета во која главна улога има елек со рачно везени елементи.
Со цел подобро да се доближи на македонската публика креаторката по ревијата на Моден викенд денес и утре (25 и 26 октомври) окорганизира шоурум/поп-ап продавница што ќе се одржи близу Плоштад Македонија, на ул. Никола Вапцаров бр.8/1-2 (https://goo.gl/maps/tDMSBuFpuT72). Покрај моделите од „Француска елеганција“ изложени ќе бидат и капсулна колекција на уникатни брошеви и дел од креациите од нејзините минати колекции.
Фотографии: Ани и Дими
Нема коментари