Младата уметничката Неда Фирфова утре (24 април) во 20 часот ќе ја отвори својата изложба насловена Always Ready во галеријата на Младинскиот културен центар во Скопје. Изложбата која е курирана од Ивана Васева е на некој начин продолжување на истражувањето на Фирфова во Тирана, Албанија кое се однесува на масовните игри или попознати кај нас како слетови. Фирфова го истражува исчезнувањето на илјадници картонски книги од Кина кои се користеле за да се формира идеолошката слика на масовните игри во Албанија, кои се одржувале на први мај за време на комунистичкиот режим на Енвер Хоџа. На изложбата ќе бидат претставени книги кои ги изработи авторката Фирфова, според сведоштва на луѓе кои се присетувале на слетовите во Албанија, две нови дела како и каталогот за настанот.
Во каталогот, специјално дизајниран и продуциран за оваа изложба Фирфова пишува:
„Во 2012 год., со грант од Институтот за современа уметност во Тирана, го истражував исчезнувањето на книгите кои биле користени за масовните игри одржувани на 1-ви мај во Албанија и за спортските настани наречени Спартакијада кои се одржувале за време на комунистичкиот режим на Енвер Хоџа. И двата настана вклучувале елементи од масовните игри кои имале за цел да го стимулираат духот, енергијата и состојбата на умот на оние кои се натпреварувале, но исто така, се разбира, и да ги засилат националните идеали, педантно комбинирајќи два вида тела: политичко и атлетско. Огромни собири на ученици, наредени во шаблон, ги држеле овие големи книги над нивните глави притоа формирајќи извонредна пропагандна слика. Книгите биле увезени од Кина, во време кога овие две држави имале блиски политички и економски односи. Чудно, а можеби и соодветно – имајќи ја во предвид присилната културна амнезија која се случила по смртта на Хоџа – нема ниту една копија од оргиналните книги во националната библиотека, архивите, ниту во било која од институциите поврзани со спорт во Албанија. Останува непознато како тие биле уништени, иако ние лесно можеме да се сложиме дека хартијата заедно со печатените материјали исчезнуваат први во време на присилно заборавање.
Според приказните на учениците во масовните игри во Албанија, книгите биле толку големи што можеле да покријат дете кое седи, имале минимум десет различни палети на бои и биле често претешки за да ги држи еден ученик, па така некогаш биле потребни двајца за да држат една книга… според моето лично искуство, книгата беше прво нематеријална и замислена и беше потребно повторно да се создаде физички, како артефакт, документ, но и како апстрактен елемент кој никогаш нема да биде прецизен артефакт и документ, туку протолкувано знаење…)“.
Неда Фирфова (1981) е уметничка, дизајнерка и истражувачка. Нејзината пракса го истражува печатениот медиум како симбол на воспоставена вистинитост во време на дигиталната ера, и модернистичките мрежи како пронајдок кој служи како оснвна алатка во демократската дистрибуција на печатената информција. Артикулирајќи или размислувајќи во печатениот медиум, нејзината практика предлага по-отворени пристапи кон дистрибуцијата на информациите. Таа често иницира обратни уреднички процеси со тоа што кани интервенции од соработниците и публиката а потоа ги интегрира.
Овие експерименти придонесуваат кон реобликувањето и преиспитувањето на начините на кои графичките дизајнери остваруваат авторитет. Неда Фирфова додипломските студии ги завршила на Факултетот за ликовни уметности во Скопје, Македонија а магистерските студии ги комплетирала на одделот за графички дизајн на
Tama Art University во Токио, Јапонија во 2009 год. Таа била истражувач од областа на дизајнот во институтот Jan van Eyck Academie во Мастрихт, Холандија, (2009-11), а докторските студии ги комплетирала на Tama Art University во Токио, Јапонија (2012). Неда Фирфова моментално живее и работи на релација Скопје, Берлин, Токио.
Од 2012 год., таа ја ко-раководи дизајнерската платформа и студио Модести.
Нема коментари