КАРОЛИНА ГОЧЕВА: Промените на изгледот треба да содејствуваат со карактерот

Со долгогодишна успешна музичка кариера зад себе и статус на модна икона, пејачката Каролина Гочева доби засега единствена привилегија да биде заштитно лице на к0зметичкиот гигант „Авон“. За Stylist.mk таа открива неколку ритуали и тајни поврзани со убавината и негата, а ни откри дека изминатиов месец ѝ бил посебно исполнет со професионални ангажмани и патувања, прво гостуваше на концертот на Дуке Бојаџиев во Карнеги Хол, Њујорк. „Веднаш кога се вратив започнав со подготовки за мојот прв солистички концерт во Белград, следниот период продолжувам со активности кои постепено ќе ги откривам“. Каролина во моментов ја промовира шминката од линијата Luxe на „Авон“, како и нивниот парфем Attraction. Сака парфеми кои не ја оптеретуваат, преферира дискретна шминка и не сака драстични промени на изгледот.

Како изгледа твојот вообичаен дневен ритуал во однос на негата на кожата и косата? Што правиш наутро кога ќе станеш и без каква нега не легнуваш да спиеш?

- Доколку немам професионални активности кожата ја одмoрам и не нанесувам речиси никаква шминка. Приватно се шминкам минимално, освен за вечерни излегувања, но и тогаш, преферирам дискретна шминка, не сакам нападни бои, лошо исцртани веѓи и слоеви пудра.

Кои се петте козметички производи што во моментов ги користиш?

- Шминката од линијата на Luxe на „Авон“, сјај за усни од истата линија, не можам да се сетам на пет омилени производи кои константно ги користам, затоа што постојано сакам да пробам нешто ново.

Без кои производи не иизлегуваш од дома и што постојаноносиш во чантата?

- Носам сјај од таа нијанса која во моментот сум ја нанела и во случај да сум се нашминкала повеќе, носам и коректор, иако, многу ретко се случува да ги искористам, немам обичај да коригирам шминка штом еднаш веќе сум излегла од дома.

Често го споменуваш твојот тим задолжен за изгледот – Цаци Паковска, Дадар и Сретен Костиќ, со кои долго соработуваш. Која е тајната на вашето усогласување и што научи од нив во однос на модата и негувањето?

- Ги споменувам само тогаш кога ме прашуваат со кого работам  Работиме толку долго што нема потреба од спомнување при секое јавно појавување. Тајната е што се познаваме долго и сме навикнале едни на други. Секако, секој во својата професија се надградува и затоа толку години сме останале заедно.

Се сеќаваш ли на првиот купен парфем?

- Се сеќавам. Го добив на подарок, затоа што тогаш бев девојче, имав веројатно 8-9 години кога беше актуелна серијата „Беверли Хилс“, па со сестра ми добивме парфеми од родителите.

Сега си заштитно лице на парфемот Attraction на„Авон“, ти се допаѓа ли неговата мирисна нота и дали често го употребуваш? 

- Одличен е! Ми се допаѓа и го употребувам секојдневно. Мирисот ми одговара, не ме оптеретува, не сакам парфеми кои цело време ги чувствувате на себе.

Веројатно како најпопуларна пејачка со долгогодишна кариера имаш кредит да рекламираш големи брендови, последниот е козметичкиот гигант „Авон“, како дојде до соработката и дали брзо донесе одлукада ги промовираш нивните производи?

- Соработката се случи на нивна иницијатива, после некоја интерна анкета која тие помеѓу своите претставници ја спровеле. Секако дека лесно се договоривме, особено ми беше драго што е поврзана со типични женски работи, шминкање, средување, дотерување…

Во една прилика спомна дека ги имаш користено производите на „Авон“, особено шминката од линијата Luxe, а сега токму ти ја промовираш. За кои призводи поточно станува збор?

- Ги обожавам сенките за очи, имаат одлична палета, огромен број на нијанси и токму оние кафени тонови кои јас ги сакам. Погоре спомнав дека ми се допаѓаат и сјаевите за усни.

Дали би направила драстична промена на изгледот? Се прашуваш ли некогаш како би изгледала како блондинка, со покуса коса или некоја подраматична шминка? 

- Промените треба да се соодветни со карактерот. Јас не сум човек кој е љубител на големи промени, така што мислам дека не би можела да се навикнкам на себе доколку нешто драстично променам. Всушност, поентата на промената е да те направи да се чувствуваш подобро, а не додатно да те оптерети.

Како ја одржуваш витата става? Вежбаш напорно или сепак е генетика во прашање?  

- Вежбав еден краток период пред две години и бев многу горда на себе, но кратко ме држеше желбата. Кога е убаво времето знам да испешачам на Водно, да повозам велосипед, но ништо од тоа не правам редовно.

Долгата коса како твојата бара многу нега. Кој е твојот рецепт?  

- Дома не ја негувам воопшто. Одам често на фризер, па тоа што ќе решат дека треба да и прават,тоа го прават. Не им се мешам многу. И се трудам барем редовно да ја потстрижувам.

Дали често посетуваш салони за убавина и кои ти се омилени третмани? 
- Освен за оние задолжителни женски работи кои мораме да ги правиме еднаш до два пати месечно, одам само кога сум расположена, иако никогаш не сум сакала да поминувам многу време во салони за убавина. Единствено што навистина сакам е масажа, ама и неа ја практикувам само кога сум уморна.
Како бираш козметички и производи за шминка и нега на коса? Колку ги следиш новините во козметката и советите на луѓето од твојот тим?   

- Не следам пасионирано, доколку нешто случајно ми налета, знам да се заинтересирам, но обично, кога ми треба нешто, веднаш се обраќам на стручно лице, си имам кого да прашам. Оној совет што ми одговара го прифаќам , тоа што не ми одговара не…Така и во животот…

Како битолчанка што живе во Скопје, како реагираш на мислењето дека битолчанките се подотерани и понегувани од скопјанките?  

- Како битолчанка што живее во Скопј, не сакам генерализации на ниту една тема.На крајот, секоја жена сака да изгледа убаво и негувано и секоја се негува толку колку што има време и може да си дозволи.

Која е според тебе тајната на убавината на македонски жени и што ги советувала младите девојчиња во однос на негувањето и изгледот?

-Македонските жени се убави затоа што и покрај најразличните влијанија, главно тежнеат кон тоа да се природни, според мене, колку е помалку накитена, намирисана, „нацртана“ жената, толку е поубава. Не ја разбирам поентата на тоа да направите нешто после кое нема да личите на себе. На младите девојчиња им препорачувам да уживаат во привилегиите на младоста, да се прифатат какви што се, да бираат вистински идоли (ако веќе мора да имаат), да внимаваат што постираат по социјални мрежи и да се почитуваат себеси.

Пример за македонска убавина?  

-Секако не може да не ја спомнам Катарина Ивановска, а би ја издвоила и Софија Куновска, која со текот на годините изгледа сè поубаво и за мене од секогаш била една од најубавите жени кај нас.