Македонската дизајнерка Евгенија Зафировска која што е школувана и работи во Словенија, ја презентира новата колекција наречена Learn. Connect. Collaborate. наменета за сезоната пролет 2019 со која сака да обрне внимание за концептот на етичка мода. Во колекцијата се среќава инспирацијата од стилот на Фортунадо Деперо помешана со елементи од македонската традиција. Еве како дизајнерката го објаснува целиот концепт:
„Фасцинирана од изложбата во Милано за италијанската уметност и култура за време на фашизмот, почнав да го истражувам италијанскиот футуристички сликар, писател, скулптор и графички дизајнер Фортунато Деперо. Неверојатниот живописен стил на Фортунато Деперо и комбинацијата на македонската традиција која е мојата црвена нишка се претставени во колекцијата преку голем дел рачна изработка и изборот на материјалите.
И во оваа колекција потенцирано е чувството за човековата етика, всушност, односот меѓу облеката и поединецот, начинот на кој облеката е градежна алатка за идентитетот. Етичката мода, вклучува вистинска почит за локалните занаетчии, нивните оригинални дизајни и традиционалното занаетчиство.
Континуирано работам за подобрување на сите фази од животниот циклус на производот, од проектирање, производство, транспорт, складирање, маркетинг и конечна продажба, употреба, повторна употреба, поправка, преработка и рециклирање на производот и компоненти.
Се стремам кон тоа да изработувам парчиња со 0% отпад на различни начини.
Дизајн врз основа на овие принципи значи почитување на клиентите на нов начин. Исто така, нуди подлабоко задоволство од производот во однос на квалитативниот дизајн, добрата хармонија и квалитетот на создавањето.“
Learn. Connect. Collaborate.
Дизајн: Евгенија Зафировска
Фотографија: Dan Briški/ Чанти: Tejajeglichdesign/ Модел: Zlata Goldy
Нема коментари