Познатата пејачка Лиза Џерард ќе одржи концет во Македонска филхармонија на 8 октомври, а ќе се претстави со нејзиниот последен проект со женскиот хор од Бугарија The Mystery Of The Bulgarian Voices, добитнички на престижната Греми награда.
Билетите се пуштени во продажба, првите 200 се по цена од 1000 денари.
Маестралната Џерард најдобро ја пепознаваме како пејачката со ангелски глас од Dead Can Dance. Родена е и живее во Австралија, каде што и ја започнува својата кариера пред речиси 40 години. Прилично експерименталната пост панк музичка сцена на крајот на 70-те во Мелбурн ја спојува со Брендан Пери, со кој во 1981 го создаваат уникатниот проект Dead Can Dance, кој опстојува и денес со неколку креативни прекини.
Dead Can Dance се неприкосновен и по многу нешта автентичен музички состав, кој обединува два вокали, кои со својата моќност и боја како да го сликаат почетокот или крајот на светот. Лиза и Брендан својата инспирација изминатите декади ја црпат од племенското, окултното, световното, но и од земското, профаното постоење.
Нивната музика може да ве потсетува на сѐ претходно доживеано и чуено, но и на ништо, да ви биде комплетно нова и свежа. Во професионалната биографија на Лиза Џерард се впишани неколку соло проекти, како и музика за филм, на кои таа се потпишува и како авторка, но и како изведувачка. Така, за музиката за епскиот спектакл „Гладијатор“, таа и композиторот Ханц Цимер беа наградени со Златен глобус.
The Mystery Of The Bulgarian Voices се женски хор од Бугарија, кој опстојува од средината на минатиот век и го негува автентичниот бугарски мелос, зачинет со нереално, самовилско пеење. Светот за прв пат слушна за овој хор на крајот на 80-те години на минатиот век, кога хорот го издава својот истоимен албум Le Mystère des Voix Bulgares, кој се продава во огромен тираж и хорот ги освојува светските сцени со своето мистично акапела пеење. Нивниот втор албум “BooCheeMish”, се појавува по речиси две декади и на него тие соработуваат со Лиза Џерард, со која иако потекнуваат од различни култури, создаваат една природна бајколика симбиоза.
Нема коментари