Црвенокосатата Симона Ничева во улога на Лејди Годива е во фокусот на фотосесијата за колекцијата The Naked Down (Голата мугра) на младиот дизајнер Мите Занов. Фотографиите ги сними Никола Илиевски на локации во стариот дел на Градски парк во Скопје.
-Соработував со Симона Ничева, модел низ чијашто енергија и надворешен изглед, младиот и талентиран фотограф Никола Илиевски успеа совршено да го долови карактерот и визијата за Лејди Годива. Стариот дел на Градски парк е локација каде што се генерираат природните феномени. Ја избравме со цел фотографиите да претставуваат алузија на фасцинацијата од нивната моќ, мистичност и магичност-вели Занов.
Фотографиите ги сними Никола Илиевски, а како модел се јавува Симона Ничева
The Naked Dawn беше промовирана на последното издание на Модниот викенд- Скопје и на изложбата „Дизајн за сите” во центарот за дизајн и иновации „Јавна соба” во организација на Министерството за Култура, како проект од областа на Креативните Индустрии. Едиторијалот е наменет за нејзина промоција на социјалните мрежи.
Колекцијата е инспирирана и е создадена за храбри личности со нескротлива имагинација што екпериментираат и се експресираат преку секојдневните изгледи. Парчињата облека се уникатни, квалитетни и иновативни.
- За The Naked Dawn, или Голата мугра, инспирација открив во приказната за витешки храбрата Лејди Годива. Маѓепсан од несекојдневниот потег со кој таа создава терен за борба против бескрупулозните нехумани вредности што владеат со човечкиот разум, колекцијата го одразува мојот облик на доживување на реалноста која ме опкружува. Формите на креациите се инспирирани од спротивностите помеѓу грациозното голо женско тело и авангардниот витешки костим се флуидни и чисти, но и радикално строги. Боите се претопуваат. Од бела и нијанси на беж до очеличувачки сребрена и бакарна. Жолтата пак, портокаловата и црвената боја што евоцираат импозантна енергија се соединуваат со виолетова, магливо сива и црна креирајќи магични сложувалки од свила, памучен сатен, штоф, кепер, плетенини и кожа -вели Занов кој професионално, моментално работаи и планирам повеќе проекти. Еден од нив е колекција за следната сезона. (А.Н.)
Нема коментари