Јубилејот од 400 години од раѓањето на славниот француски писател и комедиограф Молиер беше повод и инспирација да се реализира изложбата „Моливерзум/ Molivers“ на Технолошко-металуршкиот факултет при УКИМ во Скопје во соработка со Катедрата за романски јазици и книжевности при Филолошиот факултет „Блаже Конески“ на УКИМ во Скопје, Францускиот институт во Скопје и Националната и универзитетска библиотека „Св. Климент Охридски“. Во понеделникот на 17 октомври, во главниот хол на НУБ се случи „Моливерзум“, како спој на мода и модерна технологија, дополнето со литературни цитати од делата на Молиер отпечатени на паноа и витрини во кои се изложени различни изданија на Молиеровите дела по избор на библиотеката.
На овој настан присуствуваа гости од дипломатскиот и образовниот свет, како амбасадорот на Франција во Македонија Сирил Баумгартнер, ректорот на УКИМ Никола Јанкуловски, директорот на Француски институт во Скопје Иго Бештел, директорот на НУБ Рахметула Куќи, в.д. деканката на ТМФ Весна Рафајловска. Изложбата привлече и бројни вљубеници на модата и литературата.
Главен акцент беше ставен на изложените модни креации на тројцата студенти по моден дизајн од ТМФ, Моника Боцевска, Кристијан Арсовски и Анасатасија Петрески, кои поттикнати од творештвото на Молиер направија модно препрочитување на делови од делата на овој познат француски писател. Нивната менторка, професорката Лидија Георгиева, истакна дека читајќи ги „Тартиф“, „Мизантроп“ или „Дон Жуан“, согледале дека светогледот на Молиер е актуелен и денес во нашиот универзум/метаверзум. „Тоа нè охрабри да замислиме како би изгледале неговите ликови денес, со користење на модерната технологија, а со тоа на еден оригинален начин да го одбележиме и јубилејот од неговото раѓање“, вели професорката Георгиева.
МОНИКА БОЦЕВСКА
„Од Молиер ги избрав цитатите кои се извадок од делото „Мизантроп“. Се инспирирав од суетноста на човечкиот род за која збори Молиер, за лажливото ликување на луѓето кое на моите дизајни го претставив со различни театарски маски. Преку златниот корсет претставив една моја интерпретација на овенат цвет кој Молиер во неговото дело ги споредува луѓето како овенат цвет кога ќе се измешаат во сиот свет. Направив метафора каде симболот на правдата (вага) го претставив преку големите волуминозни ракави и внатре во нив ги внесов тие ликови (лицемерие) со цел да ја претставам неправдата која владее токму како што пишува Молиер. А таа голема корпа, е онаа корпа која во 17-от век сите ја криеле под нивните фустани , па решив да направам контраст и таа да дојде до израз.“
КРИСТИЈАН АРСОВСКИ
„Моите креации се инспирирани од стиховите на Молиер во кои тој го опишува кралот-сонце. Исто така од самиот костим од седумнаесетиот век, од виното, љубовта, поезијата и театрот. Сето тоа во контраст со металниот футуристички отсјај на вселената.“
АНАСТАСИЈА ПЕТРЕСКИ
„Секогаш сум инспирирана од пропорциите на женското тело и сакам да се истакнат неговите широки рамена, тенка половина, колкови, и тоа на уметнички, а не на вулгарен начин. Како инспирација и нешто што ми остави впечаток од делата на Молиер беше неговото кажување за љубовта, па како што може да се види на моите креации преовладува црвената боја која е како симбол за истата. Во исто време пробав да го задржам и минималистичкиот стил со футуристички акцент, во кој главна улога има линијата“.
Целокупната реализација на овој амбициозен и обемен проект чиј што носител е Технолошко-металуршкиот факултет при УКИМ, е остварена под менторство на професорките Лидија Георгиева, Ирина Бабамова и Снежана Петрова.
-Навистина се радувам што успеавме да поставиме квалитетна изложба со интересна содржина и неколку силни пораки. Благодарам на присутните гости за поддршката, беше навистина пријатно задоволство да се сподели нашето искуство од проектот. Следува фазата Париз, која што се надевам ќе биде барем исто толку возбудлива. Секако, со задоволство ќе ве известуваме и споделуваме – изјави професорката и модна дизајнерка Лидија Георгиева после понеделничкото отворање на Моливерзум.
Изложбата ќе биде поставена до крајот на оваа седмица, по што модните дзајнери ќе ја остварат втората фаза од проектот и ќе патуваат за Париз каде што ќе и претстават своите креации. Третата фаза ќе биде презентација и декорирање на излогот на Францускиот институт во Скопје.
Нема коментари