Силвија Михајловска вчеравечер по втор пат се претстави на Моден викенд-Скопје, и ако претходниот пат не прошета до Јапонија, сега нè однесе во Африка на едно урбано модно сафари преку креациите инспирирани од Карен Бликсен, ликот што Мерил Стрип го глуми во филмот „Моја Африка“ (Out of Africa, 1985), во кој костимографката Милена Канонеро дава печат на колонијална Африка.
-Карен е прикажана како борец, голем индивидуалист, истовремено силна и принципиелна личност. Колекцијата ќе го има сенсот на колонијална Африка и претставува современо видување на креациите што ги носи Карен – парчиња инспирирани од сафари стилот. Креациите се со нагласени геометриски и архитектонски форми со изразен волумен и асиметричност – вели дизајнерката.
Темите на сафари, Африка, савани и пустини често се употребуваат во модата, а дизајнерката во новата колеција за пролет-лето 2017 прави нова современа адаптација на сафари стилот со која допира и на одредени актуелни трендови (голи раменици, лелеави кошули, појаси и корсети, металик, долги впечатливи ракави, панатони со висока половина). Главна улога има новата интерпретација на сафари кошулата со додавање на нови раскршени форми, асиметрични преклопи, за да се добијат мантили, кошула-фустани, елеци, кратки јакни, фустани со деконструирани делови и други облековни изведенки кои атрибутираат на темата. Оттаму централни тонови се оние маслинесто-зелени и бежови нијанси карактеристични за сафари стилот, но дизајнерката додадава и доста жолта, бакарна, сребрена, бела и црна. Колекцијата содржи и долги лелеави здолништа, фустани со корсетирани детали, модели со посвечен призвук, контрастни споеви на покрути со лелеаи и транспарентни материјали, а доминираа копчиња, џебови, додадени елементи на облеката во вид на ленти, тријаголници и други геометриски форми. Комплетното претставување беше надополнето со шминка што реферира по малку на племенската, но повеќе на Тилда Свинтон во сцените како рокенрол ѕвезда во А Bigger Splash, како и со одличниот, специјално за ревијата подготвен DJ сет на Теа Шалдева. (K.T.)
Нема коментари