Со завршувањето на Лондонската модна недела направивме анализа на неколку колекции наменети за сезоната пролет-лето 2015, па покрај претставувањата на Том Форд, Стела Макартни, „Барбери“ и на брендот KTZ на македонскиот дизајнер Марјан Пејоски, за кои веќе пишувавме, еве сумирање и на колекциите на Кристофер Кејн, Питер Пилото, Ердем, Роксанда Илинчиќ, Метју Вилијамсон, Џајлс, Мери Катранзу, „Маркеза“ и Ања Хајндмарч.
Питер Пилото
Кристофер де Вос и Питер Пилото важно место во својата нова колекција отстапија на психоделичната естетика и на новиот начин на украсување на облеката. Креациите се вобудлив микс на повеќе елементи – на црна основа и на едноставна силуета тие додаваат бои од целиот спектар, цветни дезени и детали во стилот на acid-trip уметност.
Кристофер Кејн
Кејн направи носталгична ода на неговата менторка Луис Вилсон, легендарната и неодамна почината професорка од лондонската школа Сент Мартинс, прикажувајќи идеи начнати уште во времето кога бил нејзин студент, како на пример играта со јажињата. За дел од креациите вели дека претставуваат „контролирана експлозија“, а неговата колекција е софистиран збир од прекрасни здолништа, фустани и пеплум-форми од тул, класични блејзери, коцкести чанти, арт-деко детали и сатенски фустани.
Ердем
Дизајнерот Ердем Морлиоглу публиката ја пренесе во брилијантна ботаничка џунгла во која има раскоша флора. Како што сцената беше украсена со бујна вегетација, така и романтичните фустани беа „покриени“ со цветни орнаменти и апликации на листови. Ердем призна дека додека ја правел колекцијата размислувал на Кетрин Хепберн во филмот „Африканска кралица“.
Мери Катранзу
„Раѓањето на земјата“ или инспирација од суперконтинентот Пангеја и од суперокеанот Панталаса, фомирани пред стотици милиони години, се темата на колекцијата. Кантанзу овојпат се фокусира повеќе на материјалите и текстурата, отколку на препознатливите дигитални принтови, но тоа не значи дека шарите отсуствуваат. Иако темата е доста апстрактна дизајнерката прикажува нослива колекција во која има интригантни фустани со тенки прерамки, тантела и транспарентни делови, како и модели со споени парчиња ткаенина кои создаваат интересен мозаик.
Џајлс
Инспириран од сликите на дивиот свет на уметникот Волтон Форд, на пистата кај дизајнерот Џајлс Дикон демнеа некои навистина кул предатори преку манекенките „облечени“ во змии, леопарди, птици грабливки и канџи од диви мачки. Да, дивите животни никогаш не изгледале толку кул. Во еден дел од колекцијата Дикон предлага долги фустани украсени со светки и модели од перфорирана кожа.
Маркеза
Рокерол-џипси фантазија со примеси на хипи-гранџ во луксузна интерпретација. Звучи хаотично!? Џорџина Чепмен и Карен Крег кои дизајнираат за брендот „Маркеза“ и кои со оваа ревија прослави десет години на модната сцена, прикажаа романтична и расцветана колекција која ги има сите овие референци. Но, споени во една целина повеќе прават претстава за модерна Офелија на Гластонбери, отколку на хипи девојка на Вудствок.
Роксанда Илинчиќ
Српската дизајнерка која што живее и работи во Лондон претстави колекција од кругови, коцки и колор-блок комбинации во јаки бои. Ако сте љубител на флуоросцентна палета и строга силуета, тогаш сигурно ќе ви се допаднат идеите на Илинчиќ, како на пример здолништата кроени во круг, фустаните со набори, моделите со мали планети и други графички форми.
Метју Вилијамсон
Инспириран од 70-тите години и од британската манекенка Мари Хелвин, Вилијамсон создаде колекција во духот на таа ера, но во современа реализација – шарени фустани на преклоп, транспарентни кошули, панталони со висок струк, лелеави тканени и дезен на цветови и палмини листови за што се инспирира од едно негово патување на Бали.
Ања Хајндмарч
Дизајнерката на чанти избра одличен начин да ја претстави новата колекција – на сцена што потсетува на забавен парк ги испрати манекенките облечени во бела облека. Не случајно, затоа што акцентот е на чантите кои ги има во разни големи и бои, а некои модели се украсени со забавни стикери што наликува на детските училишни чанти.
Нема коментари