Телемама фотографирана од Иван Илиев
Македонската музичарка Телемама на 6 јуни ќе настапи во Нови Сад, во рамки на регионалниот фестивал на авторска музика „Поезика“. Под псевдонимот Телемама музика создава визуелната уметница Драгана Заревска. Нејзините навидум едноставни песни, отсвирени на акустична гитара и укулеле, се комбинација на лични приказни и социјална поезија, нежни и истовремено благо морничави.
-Телемама е кантавторското лице на Драгана Заревска, која во светот на музиката дојде од просторот на концептуалната уметност, во кој користи други лица и имиња. Наклонета кон минимализам и гола атмосферичност, неоптеретена со оркестрација, Телемама е девојка која го користи само својот сонлив, заводлив глас и укулеле како инструмент. Нејзиното пеење е сугестивно, понекогаш обоено темно романтично, како да доаѓа од друг свет, подземен или астрален. Во изборот на лирски мотиви и теми таа е склона кон далечините, но тие не се од географска природа. Нејзиниот музички минимализам е особено интересен. Таа не користи многу зборови, ниту пак многу тонови, како да целиот свој перформанс сака да го сведе на евокативниот лебдечки глас и телесното сценско присуство – пишува во програмата на „Поезика“.
Нејзината песна „Вале Терешкова“ се најде на компилацијата „Некои девојки“ која беше објавена минатата година, а за која сними и видео во режија на Љубица Манасиева. Нејзиниот деби албум насловен „Мис Слобода“ ќе биде објавен наскоро.
Фестивалот „Поезика“ ќе се одржи од 5 до 7 јуни во новосадскиот културен центар и во Галеријата ИТД на Петроварадинската тврдина. Како и претходните години, регионалниот фестивал на авторска музика ги претставува некои од најдобрите и најинтригантни кантавтори во регионот. Се издвојува концeртот на Крис Екман (Chris Ekman), член на култниот американски бенд The Walkabouts, кој години наназад живее и создава во Словенија. На фестивалот ќе настапи и хрватскиот бенд Свемир, како и српско/унгарскиот состав Rebelstar.
Нема коментари