Двојноста, како референца на две нешта што навидум се различни, а одлично функционираат како единка, е основата врз која модниот креатор Бобан Илиевски, кој стои зад етикетата Chic Undercowear, ја создал колекцијата пролет – лето 2015, наречена Dualita. Кај новите модели ја продолжува тенденцијата од зимската линија „Есенца“, на минимална игра со крој, женствени линии, и само моменти на издвојување во колор блок ефект.
-Колекцијата Dualita е наменета, пред сè, за индивидуалците, сите тие што потребата за нешто поразлично ја наоѓаат во креирање на поинаков поглед на светот со тоа што го носат. Моите парчиња само ќе им помогнат во намерата. Експериментите се минимални зашто сакам сето тоа да е крајно носливо, бидејќи модата што ја креирам треба да биде на улица, а не некое заборавено парче во шкаф-вели креаторот.
>>Твоите колекции секогаш се богати со бои и со повеќе материјали. Каков микс направи овој пат? Што лежи во основата на линијата, која боја и кој материјал се носечки?
-Дуалита е спој на црно и бело, на принт и еднобојно, колор блок на портокалова и мастило сина како мали точки на распознавање во изобилство на црно или бело…повторно доаѓам до таа моја потреба за индивидуалност.
>>Спонтано, без подолги подготовки и сценарија, пред велигденските празници направивте промотивна фотосесијата за новата колекција. Како помина снимањето и со кој тим соработуваше?
-Вообичаено било, досега за секое сликање, без разлика дали е тоа едиторијал, или пак лукбук, да трае одреден период на подготовки, концептуализирање, изедначување на погледи од сечиј аспект,шминка, фризура, светло….и.т.н. Овој лукбук го договоривме со фотографот Жарко Чулиќ толку спонтано и брзо, што крајниот резултат на сечие изненандување испадна еден фантастичен продукт на огромно задоволство на сите страни. Ангелина Блажеска, како модел бриљираше, една од ретките манекенки кај нас што никогаш нема да каже, „јас тоа не можам да го направам“. Прав професионалец. И конечно, Дарко Мишовски, мојот Ботичели, кога станува збор за шминка.
>>Зад фотообјективот повторно застана Жарко Чулиќ, со кој очигледно воспоставивте одлична комуникација и естетски баланс. Колку тој се надополни на твојата идеја при дизајнирање на колекцијата и дали создадовте некој посебен стејџ, позадина, сценографија за едиторијалот?
-Со Жарко покрај тоа што соработувам професионално, пред сè сум многу добар пријател. Chic Undercowear оваа година влегува во своето шесто лето, а Жарко е подеднакво важен дел од целата приказна колку и јас. Од самиот почеток сме заедно и неминовно е заедничкото растење, и созревање како дизајнер и фотограф да допринесе за фантастична сублимизација на идеи околу еден даден концепт за тековна колекција. Со текот на годините научивме да индивидуалноста ја преточуваме во нешто заедничко а притоа да не си се мешаме во концептите за конкретниот аспект којшто го обработуваме. Па така, кога му напоменав дека целата колекција е монохроматска црно и бело, со многу ситни акценти во боја, негова идеја беше, лукбукот да биде сликан со топли пастелни позадински бои, ненаметнувајќи се на парчињата, а воедно да ги надополнува.
>> Каде ќе може да се набави новата колекција и дали планираш да ја претставиш во некој шоурум, на некоја модна недела, изложба…?
- Онлајн продавницата Bastet Noir и оваа сезона ќе им ја понуди колекцијата на домашните и странски купувачи, повторно шоурумовите во Берлин и Софија ќе имаат дел од прачињата што тамошните бајери ќе сметаат дека треба да се продаваат.
>> Пред неколу месеци учествуваше на [SKP] popup store во Швајцарија, каде што беше еден од неколкуте македонски дизајнери-изложувачи. Како поминаа твоите креации, дали се воспостави подолгорочна врска со клиентите од Швајцарија,и какви ти се плановите за промоција надвор од Македонија?
-Првата поп-ап продавница во Берн отвори посекако врати за понатамошен продор на тој пазар.Поминав фантастично и одзивот беше одушевувачки.Дотолку да оваа сезона ќе се случува во Цирих и ќе е двојно поголем и подолготраен, од 18 до 31 мај.
>> Најави отворање на твое ателје? Дали се оствари тој план и како и каде функционира студиото?
-Решив својот нов простор на живеење во Декември минататагодина да го адаптирам делумно и во Шоурум на својата работа, давајќи еден многу поприемчив однос со сите мои досегашни а и идни клиенти кои ќе бидат повеќе од добредојдени да дојдат да си ги погледнат омилените парчиња.Во скопската населба Карпош4 во близина на сити мол повеќе од добредојдени се сите да ме посетат. Нов концепт ќе бидат и неделни бранчови на коишто ќе можат да дојдат сите клиенти за привју на новите колекции или пак некоја распродажна журка.
Нема коментари