Многу години пред Лејди Гага да се појави на црвениот килим со фустан-месо, скриена во јајце или качена на импровизиран коњ, и пред Мајли Сајрус да се разголува и беснее, на црвениот килим шокираше Бјорк. Во однос на продукцијата, идеите и реализацијата, новите ѕвезди предничат со поголеми буџети и однапред осмислени концепти. Но пејачката од Рејкјавик, од друга страна, истото го изведе далеку поспонтано и поприродно.
Во 2001 година кога исландската ѕвезда се појави на црвениот килим на доделувањето на „оскарите“ сите останаа подзинати и изненадени од нејзиниот фустан – бел лебед. Авторот на необичната креација е македонскиот дизајнер со адреса на живеење во Британија, Марјан Пејоски.
Бјорк се појави во фустанот-лебед во уште неколку наврати, и секогаш го имаше истиот шок-ефект. Го носеше на обвивката на нејзиниот албум Vespertine, на промотивната турнеја за тоа издание, како и на Канскиот филмски фестивал.
Мислењата на критичарите беа, и сè уште се, подделени околу естетските и модни вредности на моделот. Но едно е сигурно, дека креацијата е една од најнезаборавните што сме ја виделе на црвениот килим.
Денеска фустанот веќе се смета за култен. Често е вбројуван меѓу највпечатливите. „Дејли телеграф“ во 2008 година го стави на 9. место на листата за најиконични креации што се појавиле на црвениот килим. Британски Marie Claire, пак, минатиот месец го смести на својата листа со 50 фустани што ја сменија историјата на модата.
По многуте негативни критики Бјорк, бранејќи го белиот лебед на Пејоски, своевремено изјави: „Тоа е само фустан. Не знам зошто сум опседната со лебеди. Но сè што е поврзано со мојот албум Vespertine има врска со зимата, а лебедите се бели и своевидни зимски птици. Очигледно и многу романтични, бидејќи се моногамни суштества. Тоа едно од оние нешта во кои можеби сум предлабоко навлезена за да објаснам. Кога си опседнат со нешто можеш да објасниш дури по пет години, но во моментот не знаеш зошто. Сега, лебедите ми се симбол за многу нешта“.
Нема коментари