„Шанел“ објави кој ќе биде новото заштитно лице на легендарниот парфем N ° 5
После Карол Буке, Кетрин Денев, Ванеса Паради, Никол Кидман, Одри Тоту, Жизел Бундшен и многу други познати жени кои го рекламирале Шанеловиот парфем, новата вест е дека актерката и оскаровка Марион Котијар е новото заштитно лице во кампањата за N ° 5. Со изборот на Марион брендот „Шанел“ сака да ја нагласи француската елеганција и природната убавина. „ Автентична, посветена и дарежлива, Марион Котијар својата уникатна перспектива ја води од филм до филм, создавајќи исклучителна судбина на слободна жена. Совршена инкарнација на француската природна убавина, Марион има неодолива „je ne sais quoi“ аура. Таа ја внесува својата елеганција во имиџот на иконичниот N ° 5“, се вели во соопштението на „Шанел“.
Историјата на парфемот Chanel N ° 5 започна во 1920 година кога Габриела Коко Шанел го запознала Ернест Бо, хемичар и поранешен парфумер за руското кралско семејство, кој од Русија избегал после револуцијата. Коко на Ернест му дала инструкции дека сака „парфем кој мириса како жена“. Бо неколку месеци работел на парфемот и конечно ѝ презентирал десет шишенца со пробни мириси именуваи од 1 до 5 и од 20 до 24. Таа го избрала парфемот од шишенцето со број 5.
Во мај 1921 е претставен Chanel N ° 5, сосема необичен мирис во тоа време, толку поразличен од мирисите за оние „поугледните жени“ кои сакале да мирисаат како цветовите во градина, додека потешките парфеми на база за животински мошус биле поврзувани за попровокативните жени и куртизаните. Шанеловиот број 5 им се обрати на сите жени и го слави ослободениот женски дух од 20-тите години на минатиот век. Без сомнение, Chanel N ° 5 е најпознатиот парфем, кој и денес, после 99 години не ја губи примамливоста и популарноста.
Новата кампања со Марион Котијар ќе се појави подоцна оваа година, засега „Шанел“ објави само еден црно-бел портрет на актерката.
Нема коментари