Креативната ветерница, која создава уникати од епоксидната смола, почнува да врти нова инспиративна приказна. Дизајнерката на уникатен накит Марија Манева под својот бренд Windmillshop деновиве промовира нова колекција ѓердани, која е поразлична од претходните.
-Епоксидната смола е мојата прва љубов и таа ќе трае уште долго :), сепак во изминатиов период работев на два големи проекти кои траеја речиси четири месеци и во овој период интензивно работев со смола и полимерна глина. Целиот креативен фокус ми беше насочен кон успешна реализација на проектите и по нивното завршување почувствував потреба да се одморам од овие материјали за кога ќе им се вратам, да биде тоа целосно и со истата возбуда која ја имав кога ги сретнав за првпат-вели Мариjа, која покрај тоа што дизајнира накит, редовно одржува работилници за накит од епоксидната смола.
За разлика од претходните линии, каде што доминира смолата, новата колекција е изработена од текстил.
- Неодамна се сетив дека пред неколку години, кога мобилните телефони се носеа во мали чантички, јас си правев свои. Ги правев од памучни врвки, кои ги шиев во форма на круг. Така се роди идејата да направам ланчиња од врвки, а првичната идеја потоа се разви во колекцијата „Circle stories“ – колекција на ланчиња направена од памучни материјали. Новите тркалезни приказни допрва ќе ги раскажувам затоа што пред неколку дена промовирав само четири модели, а колекцијата ќе биде составена од 12 модели на ланчиња-вели таа.
Кога ја создавала линијата Circle stories размислувала за девојките и жените кои ја негуваат својата автентичност, дамите чиј моден стил е исто толку харизматичен и инспиративен колку и нивниот дух.
-Многу сум среќна што живеам во време во кое визуелната комуникација станува примарна, ова е време на визуелни уметности, сликата е основниот елемент, а зборот и звукот само го надополнуваат уметничкото доживување. Социјалните мрежи и интернетот достигнаа огромен успех само зашто се базираат на визуелната комуникација- која е универзална. Сето ова оди во прилог на сите оние коишто се занимаваат со креативна и уметничка дејност и тоа од два аспекта. Прво, од економски или маркетиншки аспект, затоа што веб-страниците, Фејбук и Инстаграм се платформи кои ја овозможуваат најефикасната глобална промоција на брендот и производите. И второ, од социјален и културолошки аспект, затоа што во пакетот на визуелната комуникација силно е изразен „атуфитот“, односно, модниот стил-вели таа.
Токму профилите на социјалните мрежи се местото каде што сите заинтересирани за нејзините креации и работилници може да ја контактираат Марија.
-Достапна сум на мојата фан страница, на инстаграм или на мојот блог, одговарањето на пораки е една од моите омилени задачи затоа што често ми се случува формалните „инбокс“ пораки со непознаници да прераснат во прекрасни реални пријателства-додава таа на крајот.
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари