Откако модната креаторка Лидија Георгиева и архитектката Искра Јанковска Михајловска ги споија своите кративни мисли во заедничкиот дизајнерски проект Iskra&Lidiya Blueprint и создадоа колекции на софистицирани креации за домот, сега приказната за взаемната творечка соработка ја подигнуваат на ново ниво и воведуваат нова услуга на полето на уредување на внатрешните простори, која ќе ја претстават утре, 25 ноември, од 17 до 18 часот во „Јавна соба“ во рамките на програмата на Неделата дизајн во Скопје. Искра и Лидија на утрешната презентација Design Infusion ги повикуваат сите вљубеници во убаво уредени простори и оние кои имаат желба и потреба за дизајнерско уредување на ентериер, ќе зборуваат за современите тенденции на полето на дизајнирање на ентериери и на самиот настан ќе понудат консултации. Може со себе да понесат фотографија или скица од просторот што сакаат да го уредат и веднаш ќе добијат совет.
-Идејата на презентацијата што ќе се одржи утре е преку едно панорамско презентирање на најновите светски тенденции во ентериерно уредување да се сензибилизира домашната публика и клиентела на потребата да се обрати на дизајнер на ентериери и со тоа да добие комплетна и персонализирана услуга според својот буџет и според својот карактер. Нашата презентација ќе се одржи на забавен и интерактивен начин. Публиката после пезентацијата ќе може да поставува прашања и повикана е да донесе фотографии од својот дом или работен простор, кој што би сакале да го транформираат со наша консултација и во однос на сопствениот буџет – вели Лидија.
На презентацијата Искра и Лидија преку примери ќе ја објаснат својата услуга и ќе понудат првична консултација на заинтересираните.
-На утрешната презентација ги повикуваме сите кои сакаат во наредната година да го редизајнираат домот, канцеларијата или некој друг простор, оние кои сакаат да ангажираат архитект и дизајнер, луѓе кои веќе направиле некакво истражување или им треба комплетен проект за уредување. Ќе разговараме за самиот процес на редизајнирање, грешките кои се прават и како да се избегнат за преуредувањето на домот да биде задоволство – вели Искра.
Искра и Лидија претходната година на Неделата на дизајн во Скопје ја претставија првата колекција на софистицирани дизајни за домот, перници, завеси, мебел, огледало, ѕидни декорации со специфичен принт. Во текот на годината можеби станаа препознатливи по перниците кои веќе ги красат домовите кај нас и надвор од Македонија. Но, Искра и Лидија сакаат да ја прошират перцепријата за нив дека се само креатори на перници, туку на целосно домашно уредување. Велат дека перницата ја зеле како предмет што е пренослив и преку кој лесно се прикажува првичната идеја за еден дизајн, платформа околу која понатаму може да се развие комплексен дизајн.
–Покрај тоа што ќе можат да се запознаат со новиот проект кој опфаќа уредување на домови и канцеларии, сакаме на тие што ќе дојдат да им дадеме попуст на нашите дизајни во наредната година и попуст во продавницата „Талија“ во текот на следните 365 дена. Тие што ќе дојдат на утрешната презентација ќе добијат ваучер и сè што ќе го купат во „Талија“ во наредната година ќе биде со 10% попуст – ни објасни Искра.
Двете креативки ни кажаа дека ќе продолжат да создаваат и промовираат нови колекции, во следниов период ќе бидат презентирани нови производи за домот со потпис Iskra&Lidiya Blueprint.
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари