Петнаесет водечки македонски модни дизајнери учествуваат во акцијата „Сите стоплени во зима“ со цел да се собере користена зимска облека за луѓето на кои им е најпотребна, а акцијата ќе кулминира со модна ревија на која јавни личности ќе ги претстават нивните креации со користена облека. Ревијата ќе се одржи на 31 јануари (среда) во МКЦ, со почеток во 20 часот, а влезницата е – донирана зимска облека. Дојдете, донирајте зимска облека и бидете дел од настанот!
До настанот во среда погледнете како нашите дизајнери се подотвуваат за ревијата.
ЛИДИЈА ГЕОРГИЕВА
„Во време на хиперпродукција во модната индустрија, не смее да се дозволи луѓе да немаат топла облека. Се надевам дека оваа акција ќе им помогне на тие на кои навистина им е потребно. За соучесник во мојот редизајн проект, го одбрав Огнен Јанески, сигурна сум дека ќе биде одличен во оваа улога. На фотографиите сум заедно со мојата студентка Ангела Доневска, која ми помогна во изработката“
АНТОНИЈА РИСТОВСКА
„Поканата да бидам дел од проектот ја прифатив без размислување. Мојата мала помош на некого ќе му биде голема и чувството кога ќе видам задоволно лице за мене е посебно. Сум била дел од повеќе хуманитарни настани и тоа што можам да му помогнам некому ме прави навистина среќна“.
ЈАНА АЦЕВСКА
„Големите работи се прават со мали работи направени заедно. Чест ми е да бидам дел од екипата креативци со кои заедно ќе покажеме дека можеме да бидеме ‘големи’ и да придонесеме кон акцијата „Стоплени во зима“.“
ГОРАН КОСТОВСКИ – ИНДОГ
„Големината на еден човек не се состои во тоа колку има, туку колку придонесува и помага општествотo да биде подобро“.
НИКОЛА БУЛЕСКИ
И Булески подготвува креација за ревијата „Сите стоплени во зима“.
ОЛГИЦА ЃОРГИЕВА
„Има две големи работи во животот кои создаваат среќа, а тоа се растење и прогрес, и давање! Преку помагањето на другите си помагаме на самите себе!.. Одлична, освестена акција за која што сум сигурна дека ќе разбуди многу луѓе од сон!“
ИРИНА ТОШЕВА И ИВАН ПЕТРУШЕВСКИ ФЛИМ
Тошева и Флим работат заедно на креација за акцијата.
ЕМИЛИЈА М. СТАВРОВА (ЕМ ЕЛЕФАНТСКИ)
„Многу се радувам на акции од таков вид. мпатијата, сомилоста и љубовта ќе го спасат светот. Светот се буди од заспаноста и заборавеноста за себе. Сите промени што сакаме да ги видиме во светот, почнуваат од нас… Длабок наклон за „Сите стоплени во зима”.“
НИКОЛА ЕФТИМОВ
Ефтимов со рачна доработка на користена облека.
НИНА СИМОВСКА
„Мојот мотив за учество во оваа хуманитарна акција е да покажам дека сеуште знаеме да се грижиме еден за друг. Да се потсетиме, сите заедно, дека нема ништо поубаво од чувството да создадеме причина за една насмевка и исполнето, стоплено, срце.“
БЛАГОЈ МИЦЕВСКИ
„Со задоволство го реализирам овој проект од хуманитарни причини, но и заради надежта дека во еден мал сегмент ќе го промени востановениот однос кон „користената облека” но и односот кон облекувањето воопшто. Во комерцијализираниот и унифициран свет во кој живееме се надевам дека ова ќе биде мал придонес за истакнување на креативноста на дизајнерите но и индивидуалноста на оние што ќе ја носат редизајнираната облека.“
ЈАНА МАНЕВА ЧУПОСКА
„Драго ми е што сум дел од хуманитарна акција која е двонасочна. Од една страна е голем предизвик за дизајнерот да придонесува во делот на она што се нарекува општествена одговорност, да биде хуман, да помага преку својата професија. Од друга страна страна за дизајнерот е предизвик да одговори на ваква интересна задача, процес на редизајнирање на носена облека, која барем за мене е голем креативен предизвик. Искрено се надевам дека моите креации некого ќе направат многу среќен и дека ќе се чувствува удобно во искреираните два модели.”
Нема коментари