Во пресрет на прикажувањето на филмот „Куќата на Гучи“ со Лејди Гага и Адам Драјвер, да се потсетиме на вистинската приказна за Патриција Реџани Гучи или „црната вдовица“ како што ја нарече италијанскиот печат
Едно пролетно утро во март 1995 година, нешто после 8.30 часот, Маурицио Гучи, правнук на основачот на славната италијанска модна куќа Гучи, излезе од неговиот стан во Милано за да направи кратка прошетка до неговата канцеларија на улицата Виа Палестро 20, во модниот дистрикт на градот. Беспрекорно облечен во костум, вратоврска и што друго, ако не мокасини со потпис на Гучи. Додека пешачеше до својата канцеларија, еден човек кој одеше зад него, го застрела пред да влезе во зградата за да започне со уште еден работен ден на чело на империјата Гучи. Вооружениот напаѓач испука три куршуми во грбот на Маурицио кој потоа падна мртов на мермерниот под пред влезот на неговата канцеларија.
Овој шокантен чин на дивјаштво наскоро стана едно од најозлогласените убиства во модерната историја на Италија, а две години истражителите се обидуваа да покажат со прст не само кон атентаторот, туку и кон оној кој очигледно го ангажирал да го изврши убиството.
Дали некој го нарачал убиството поради долговите на Маурицио? Можеби некој од раскраните членови на семејството Гучи? Не, на крај се откри дека личноста која го нарачала атентатот врз Маурицио е Патриција Реџани, неговата поранешна сопруга и мајката на нивните две ќерки.
Несреќна што ѝ беа исплаќани само 1.1 милион швајрцарски франци годишно како финансиска поддршка по нивната горчлива разделба и преплашена од можноста тој повторно да се ожени, Патриција му нанесе смртоносен удар на својот поранешен сопруг.
Оваа неверојатна приказна – мешавина од висок гламур, луксуз, љубомора, пари, измама и бруталност, сега повторно се најде во фокусот на светскиот интерес, со објавувањето на првата фотографија од сетот на „Куќата на Гучи“, драматизација на настаните што доведоа до убиството на Маурицио. Режијата е на Ридли Скот, а Лејди Гага ја глуми Патриција.
Патриција Реџани родена во мал град близу Милано. Иако богати, семејството Реџани никогаш не било дел од високото општество, но упорната Партизарија успеа да го најде своето место меѓу елитата во Милано преку бракот со Маурицио Гучи. Со Маурицио се запознала на некоја забава, тој веднаш се вљубил во неа, но таа на почетокот не размислува премногу за него. Сепак се венчала за него во 1972 година, иако семејството Гучи не го одобрило нивниот брак – особено реагирал неговиот татко Родолфо, што поради потеклото на Патриција, но повеќе поради нејзиниот карактер. Сепак, Родолфо го омекнал односот кон неа откако таа ја родила ќерката Алесандра.
Маурицио, како единствен син, добил многу луксузни имоти од неговиот татко, вклучително и скап пентхаус во Њујорк. Во тоа време, парот Гучи беше дел од светската елита и пријатели со Џеки Оназис. Живееле луксузен живот, полн со патувања, гламур, раскошни забави, пентхауси, приватни авиони, летувања на нивниот имот во Акапулко, зимувања во Сен Мориц, а поседувале и голема јахта што Маурицио ја купил откако се родила нивната втора ќерка Алегра.
Сè почна да се распаѓа во 1983 година кога починал таткото на Маурицио, Родолфо. Маурицио ја презеде контролата врз семејниот бизнис, но фирмата Гучи почна да губи милиони поради неговите мегаломански проекти. Подоцна Маурицио својот дел од бизнисот го продал на бизнис групација од Бахреин. Се распаѓа и неговиот брак со Патриција, тој во 1985 година го напушти семејниот дом и се пресели во Фиренца. Официјално се раведоа во 1991 година, иако Патриција продолжи да го нарекува „мојот сопруг“.
На суд како дел од разводот бараше што е можно поголема исплата на годишно ниво, но една друга работа повеќе ја „јадеше“ – Маурицио веќе пет години беше во врска со помладата Паола Франчини и не можеше да замисли дека тие можеби наскоро ќе се венчааат. Уплашена дека ако Маурицио се венча со Паола моќта, парите и статусот што ги стекнала ќе исчезнат и дека ако парот има деца, ќе исчезне и наследството на нејзините ќерки. Нешто мораше да се направи. Водена од љубомора и без дека може да има само една госпоѓа Гучи, спасот го најде кај Бенедето Царауло, сопственик на пицерија со огромни долгови, кого Патриција ќе го најми да го убие Маурцио.
Ден после убиството Патриција ќе ја избрка Паола од станот на Мауруцио и самата ќе се всели и живее во него сè додека не биде уапсена и обвинета за убиството на екс-сопругот. Италијанскиот печат веднаш ја нарече црната вдовица.
Паола се сомневаше во Патриција, а и многу работи упатуваа во насока на нејзина вина. Во документарецот „Лејди Гучи: Приказната за Патриција Реџани“, и самата Патриција ќе признае дека насекаде се распрашувала, дури и во локалниот гранап, дали некој ќе сака да го убие нејзиниот сопруг. На крај се пријавил пица мајсторот…
Судењето на Патриција ќе почне во 1998 година, се појавиле многу конфликтни приказни, но на крајот, Лејди Гучи која секој ден на судење доаѓаше облечена во Гучи од глава до петици, беше осудена на 29 години. Ќе отслужи многу помалку и во 2014 веќе е на слобода. Судот пресуди дека таа сè уште има право на онаа годишна сума од имотот на нејзиниот убиен поранешен сопруг и ретроактивно ѝ додели околу 18 милиони евра.
Сега таа има 72 години, го дели својот дом со својот папагал и кучето и, зачудувачки тврди дека човекот што наредила да биде убиен е „нејзината единствена вистинска љубов“. Се верува дека ќерките Алесандра (44) и Алегра (40) живеат во Швајцарија и дека немаат контакт со Патриција.
Во моментов Партиција е многу лута затоа што Лејди Гага не ја исконтактирала пред снимањето на филмот, за да се подготви го градењето на ликот…
Кога Патриција беше прогласена за виновна како нарачател на нејзиниот сопруг, се вели дека дека продавниците на Гучи низ Италија, симболично обесиле сребрени лисици на своите излози.
Нема коментари