Следејќи ја тенденцијата за зголемена грижа за здрав живот и конзумирање што е можно повеќе органска храна, голем број на луѓе се одлучуваат и за фарбање на велигденските јајца на природен начин. За оние кои не ја сакаат прехрамбената боја и се плашат дека при јадење на јајцата ја внесуваат и вештачката боја, еве неколку идеи како да ги обоите јајцата со помош на лушпи од кромид, друг зеленчук, зачини, а на Пинтерест ќе најдете безброј идеи за боење со вино, кафе, чај…
Можеби нема да постигнете интензивност во боите, но ќе знаете дека сте ги офарбале на природен начин без употреба на вештачки адитиви.
За да го спречите пукањето на јајце за време на подготовката, извадете ги од фрижидерот порано за да постигнат собна температура, потоа измијте ги и ставете го во ладна вода во која сте додале малку сол. Ако сакате бојата да биде поизразена, оставете ги натопени во растворот преку ноќ, но во фрижидер.
Пред боењето може да ги обвиткате јајцата со листови од билки или со неколку ластичиња, за да добиете шари. Во водата вокоја се бојат се додава и оцет како зајакнувач на бои, но додадете го ако фарбате со кромид или зачини, но не и ако боите зеленчук и овошје, бидејќи тогаш водата ќе стане сива или кафена. На еден литар вода се ставаат две лажици оцет. После боењето откако јајцата ќе оладат премачкајте ги со масло.
Нежно црвенкаста боја – Ставете лушпа од кромид во вода и вриејте ја додека не се смени бојата и потемни. Нека се куваат десет минути.
Интензивно жолта – Користејќи ракавица, ставете три лажици од зачинот куркума во литар вода и додадете две лажици бел оцет.
Портокалова - Ставете пет лажици слатка црвена пиперка и две лажици бел оцет во литар вода.
Црвена – Користете конзервирани цреши и сок, додека за темноцрвена наместо вода, ставете сок од брусница.
Розова – Ставете околу 800 грама цвекло исечено на кругови во топла вода. Иако на почетокот ќе изгледат темнокафени, кога ќе се исушат јајцата ќе имаат нежно розова боја.
Сина – Додајте 600 грама сецкана црвена зелка во топла вода. За посветла боја држете јајцата околу половина час во топлата вода, ако сакате поинтензивност оставете ги во фрижидер преку ноќ.
Зелена – Ставете 100 грама спанаќ и замрзнати боровинки во блендер и додадете литар сок од боровинки. По варењето додадете две супени лажици куркума.
Сивосребрена – 800 милилитри вода се мешаат со 800 грама замрзнати боровинки. Оставете боровинки да се одмрзнат во водата и да постигнат собна температира. Исцедете ја течноста од боровинките и оставете ги јајцата во неа преку ноќ во фрижидер.
Виолетова – Се варат сушени боровинки во 250 милилитри вода. Правилото е следно – колку повеќе боровинки, бојата ќе биде поинтензивна.
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари