Десет ексклузивни модели на Олгица Ѓоргиева инспирирани од светот на бајките и претставени преку танцов перфоманс беа прикажани за крај на овосезонското издание на Моден викенд-Скопје, што изминативе денови се случуваше во новата катна гаража „Солунски конгрес“. Дизајнерката Ѓоргиева преку колекцијата „Одберија ја својата бајка“ за пролет-лето 2015 најави свечени фустани за принцези, Пепелашки, Снежани и Црвенкапи кои лесно може да се преведат и како матурски креации. Манекенките од агенцијата „Подиум“ два дена се подготвуваа со неколку танчери од студиото „Прима данца“ за модно-танцовата приказна што ја прикажаа на пистата со референци на неколку омилени бајки. Олгица за колекцијата избра светла палета бои, но и неколку креации во црна и интензивно црвена боја. Во нејзините модели доминираат набори, волумензни здолништа до колена и ткаенини украсени со светки и тантела.
Големо внимание привлече аголот посветен на проектот на блогерката Јована Зука и „Фешн груп Македонија“ наречен „Џинсоманија“ и кој се состои од капсулна колекција на маички со порака. Блогерката поттикната од безвременските комбинации од фармерки и маички осмисли шест натписи кои се игра на зборови поврзани на темата џинс, како Jeans Paul Gaultier, Carpe Denim, Шармерки во фармерки, а кои се отпечатени на бели памучни маици.
Во свечено расположение на вчерашниот трет ден на FWSK беа Дејан Тодоровиќ, Hera Couture и модната куќа „Менакон“ од Косово. Тодоровиќ кој прв пат настапува на Моден викенд-Скопје ја прикажа колекцијата Happy составена од вечерни фустани од претежно светкави ткаенини, припиени кроеви и саксапилни изрези.
Тимот на модната куќа Hera Couture инспириран од животот на Марија Калас предлага свечени вечерни фустани и комбинезони во интензивни бои од ткаенини со ефект на прелевање на нијанси и украсени со циркони. Модната куќа „Меркакон“ претстави свечени креации кои се дел од колекцијата „Спиритуализам“.
Во програмата на FWSK видовме и колекција која ги следи потребите на деловната жена. Домашната модна куќа „Линеа“ понуди серија на панталони, блузи и фустани во различни бои и принтови, како и модели инспирирани од Африка што може да се забележи во животински и принт инспириран од африканските племиња. Покрај модни парчиња од тркаенина, видовме и креации од свежо цвеќе преку „Пролетна магична приказна“, проект на Јагода Пачемска од арт-студиото за цвеќе „ФА-БУ “. Офцијалниот дел од Моден викенд-Скопје заврши вчера, но организацијата за 17 април ја најавува презентацијата на новата колекција на Mcouture by Mila Kadriu. (К.Т./ Фото: Ани и Дими)
Нема коментари