Откако ги разбуди сите сетила со пролетната колекција Senses, дизајнерката Олгица Ѓоргиева ја продолжува приказната за модно навраќање кон себе, својот стил на креирање и своите корени. Оваа нежна, тивка, но трудољубива креаторка, која со напорна работа го изоде патот до препознатливо име на нашата модна сцена, подготвена е за уште едно себеоткривање, кое ќе значи истовремено и допир до модните вкусови на современата македонска жена. Новата колекција наречена Touch of my soul, наменета за есен-зима 2016/17, ќе ја претстави на 31 октомври во „Скопје Мериот Хотел“, во рамки на 14-тото издание на Моден викенд Скопје.
- Како што веќе спомнав и предходната сезона, последниот период комплетно се навраќам кон себе, својот стил на креирање и своите корени. Навистина мислам дека имам квалитетна приказна кои ја започнале моите предци и која би сакала да ја продолжам и на која што би можела да базирам многу мои сегашни и идни проекти, со оглед на тоа што веќе активно работам повеќе години. Оваа колекција повторно го одликува мојот стил: минималистички израз надополнет со доработки, кои се карактеристични за мене. Вметнувам принтови и техники на доработка што ги користела мојата баба во своите дела што ги создавала. Сето тоа многу суптилно и стилизирано, во една модерна верзија, прилагодена за денешно време.
>>Препознатлива си по романтичните и женствени креации, кои се баланс меѓу класичните кроеви и модените форми. Во каков стил ќе бидат новите креаци и какви парчиња, бои и материјали ќе домининираат?
- Станува збор за елегантна, модерна колекција, во која преовладуваат чистите линии.Се среќаваат црна, бела, црвена и нијанси на плава боја . Се состои од секојдневни парчиња облека до свечени тоалети. Се она што бараат моите клиенти. Креациите се изработени од свила, кадифе, стилизирани сатени, органтин, тексас и друго.
>>Во секоја нова колекција иако си доследна на својот стил, се предизвикуваш себе си како дизајнер да бидеш нова, свежа и поразлична… По што ќе се разликуваат новите креации од претходните?
- Она што вистински ме води напред во однос на мојата работа, особено во последно време е да си ја задржам својата оригиналност и својот личен печат. Мислам дека со годините успеав да изградам еден стил по кој сум препознатлива и во иднина уште повеќе сакам да го потенцирам тој момент. Новата колекција се доближува до мојата личност, моите корени, продолжување на една традиција.
>> Изминатите неколку сезони го погодиваш вкусот на талентираните, бизнис и модерни жени, кои се во постојано движење. Која е жената на која и се обраќаш со новата линија?
- Се обраќам на личност со чист, софистициран стил, исполнет со креативност на еден суптилен начин.
>>Talent is the new sexy e темата на претстојниот Моден викенд-Скопје. Дали твојата колекција се надоврзува и поклопува со мотото на ова издание?
- Отсекогаш сум се согласувала дека суштината е вистинската работа во животот… Ако внатре е празно, тоа надвор нема тежина. Талентот е нешто што дефинира одредена личност, талентот е причина за нови достигнувања, нови откритија, одбележување на историски периоди итн.
>> Изминатиов период често патуваш. Како професионално се одразуваат овие патувања, можен лие пласман или соработка во странство?
- Веќе почнав еден проект, поврзан со Германија. Започнав со изработка на луксузни германски носии Дирндл. Ова е проект кој допрва интензивно ќе се развива… Во процедура се уште неколку идеи што можеби ќе ја дефинираат мојата работа во неколку правци.
>>Какви се плановите за новата колекција по ревијата во Скопје? Што е во твојата агенда до крајот на годината?
- Новата колекција како и секогаш ќе биде достапна во моето студио. До крајот на годината нема уште многу, меѓутоа би сакала да затворам неколку работи и во Новата година да започнам со новите проекти кој ги имам во план. Тековни нарачки и работа со клиенти си продолжуваат да функционираат во моето студио.
>>Кои ангажмани ти го одбележаа периодот меѓу пролетното и есенското издание на Моден викенд?
- Како што спомнав погоре, проектот со германските носии, кој во иднина само ќе ја шири својата приказна, во повеќе правци.
Нема коментари