Во пресрет на петтото јубилејно издание на „Мала Италија патува” разговараме со Павле Камилоски, изведувач, уметник и иницијатор на Мала Италија патува, за она што ќе следи вечерта на 18 септември на Плато Мајка Тереза, пред Филхармонија. Камилоски раскажува како се подготвува за концертот, што му е поттик и мотивација и кои емотивни изведби да ги очекуваме.
Оваа година се одржува 5-то јубилејно издание на „Мала Италија патува”, како течат подготовките за овој концерт, дали може да ни откриете нешто повеќе за самиот настан?
-Секоја година, обврските и посветеноста околу самата организација се повеќе се зголемуваат, бидејќи од година во година Мала Италија расте и се развива. Големи проекти, уште поголеми обврски и подготовки. Самиот факт дека концертот ќе се организира под отворено небо на платото Мајка Тереза, бара голема инволвираност од страна на технички лица, голема логистика, поставување голем број столчиња итн. И покрај двојно зголемената организација, искуството ни покажа дека, да се приреди концерт под ѕвездите и на една од поубавите локации во Скопје е незаменливо доживување со посебна магија и неодолив шарм.
Што може да очекува вашата публика од годинешното издание на „Мала Италија патува”, дали ќе има некои новитети или можеби промени во репертоарот?
-Неизмерно сум и благодарен на публиката која секоја година ме поддржува и е во се поголем број, исто така особено сум благодарен на сите спонзори и поддржувачи кои на кој било начин даваат свој инпут и придонес за Мала Италија. Токму поради нив на пат е да се случи петтата „Мала Италија патува” која ќе биде поразлична од сите останати. Оркестарот ќе биде во скратен состав кој ќе брои единаесет исклучително талентирани музичари. Овој пат ќе има доста освежување на репертоарот, и покрај италијанските канцони и француски шансони кои се изработени во нови аранжмани и прилагодени за новиот музички состав, голем дел од останатите песни ќе бидат за првпат интерпретирани, со тоа што публиката ќе има можност да ги слушне неповторливите евергрини на Frank Sinatra, Dean Martin, Nat King Cole, Tom Jones, Elvis Presley.
Како изгледаат подготовките на Павле пред настап?
Секогаш, на секоја проба ја визуализирам и замислувам публиката, публиката е мојот главен мотиватор и предизвик. Пред секој настап, без исклучок, каков и да е, каде и да е и колкав и да е, одговорноста и посветеноста е иста. Што се однесува до подготовките практикувам секојдневни кондициски вежби, вежби на вокалот, вежби со пијано не само пред настап туку и во текот на целата година, бидејќи гласот е жив инструмент кој има потреба од дисциплина, посветеност и секојдневна работа.
Каков вид песни пее Павле и во кој вид музика најмногу се пронаоѓа?
-Обожавам да интерпретирам музика која има тежина, душа, која е темелна, која знае да предизвика емоција, тоа се сите евергрини кои веќе ги напоменав.
Имате ли омилена песна, без која не ви поминува ниеден настап?
-Сепак публиката ќе препознае која е моја омилена изведба и без која ни еден концерт не поминува…
Кога би требало да издвоите еден ваш концерт како омилен, тоа би бил…
-Не би можел да издвојам еден омилен концерт , бидејќи низ годините секој концерт ми носеше различно и посебно искуство и секоја година со различна динамика во која комплетно се предавав и целосно уживав.
Кои се вашите планови за во иднина?
-Покрај музиката која ја интерпретирам, размислувам и посакувам моја авторска песна која ќе го одбележи ова мое петгодишно музичко искуство.
Нема коментари