Модното ателје „Алшар“ постои повеќе години на домашната сецна, а дизајнерката што ги потпишува креациите Силвија Михајловска сега ја најавува новата сезона со колекција во четири бои инспирирана од сликите на Пит Мондријан, модерната архитектура и на суптилен начин и од етно иконографија. Силвија можеби не е многу присутна со модни ревии и настани, но таа редовно креира колекции и има свои редовни клиенти. Сега одлучи покативно да се вклучи во модната сцена, а првиот чекор е комплетна колекција за есен-зима 2014/15 која ќе се презентира преку модни едиторијали. На Stylist.mk ви ја откриваме новата фотосесија направена со фотографот Александар Михајловски и моделот Маја Илиоска, а употребени се парчиња накит што Глигор Кузмановски специјално ги креираше за колекцијата.
АЛШАР „Четири бои„/ Фото: Александар Михајловски/ модел: Маја Илиоска/ накит: Глигор Кузмановски/ стајлинг: Сандра Стефановиќ
-Новата колекција е замислена да биде поделена на четири дела, во првиот акцентот е ставен на црвената боја, а понатаму ќе следуваат парчиња во кои ќе доминираат кобалтно сината, црната и сивата боја. Колекцијата содржи најмногу фустани, но има и панталони, здолништа, како и парчето на сезоната – пончото. Сите се карактеризираат со строги геометриски форми изработени од памучни и волнени ткаенини – ни кажа Силвија.
Поради изборот на четири бои, колекцијата е наречена токму „Четири бои“, а дизајнерката ни откри дека модните парчиња најмногу се инспиритани од сликите на Пит Мондријан, неговите геометриски форми и изборот на бои, како и од современата архитектура што се гледа во строгите линии на некои од кроевите, а има и по малку етно мотиви во принтовите на ткаенините.
-Воедно ова е и моја интимна посвета на трилогијата филмови „Три бои: сино, бело и црвено“ на режисерот Кишловски – вели дизајнерката за инспирацијата на колекцијата.
За подобро претставување на новата колекција на „Алшар“, дизајнерката подготви и фотосесија.
-За првиот дел од колекцијата „Четири бои: црвена“ е изработена фотосесија во урбаниот амбиент на МКЦ со фотографот Александар Михајловски, моделот Маја Илиоска, со која соработувам постојано, стајлингот е на Сандра Стефановиќ, и со прекрасниот накит дизајниран од Глигор Кузмановски специјално изработен да ја надополни оваа колекција – вели Силвија која планира претставување на целата колекција преку модни едиторијали.
Ја прашавме дизајнерката што се крие зад името на брендот, таа ни потврди дека доаѓа од името на рудникот Алшар и од симболиката што тој ја претставува за неа – едниствен минерал, поврзан со Сонцето, ретко и скриено богатство. Во однос на означувањето на модниот израз на нејзиниот бренд, Силвија вели дека создава облека која ја глорифицира женственоста, со голема доза на драматичност, но и функционалност. Таа модното ателје „Алшар“ го отворила во 2008 година, апо кратка пауза од мај оваа година функционира на нова локација, на улицата „Ленинова“, меѓу популарните кафулиња Бaстион“ и „Деус“.
-Од самиот почеток идејата беше на урбаните девојки да им се понудат уникатни дизајнерски парчиња облека од квалитетни природни ткаенини со многу рачни доработки, како сликани и везени детали, и сè тоа по мошне пристапни, „нормални“ цени. Можеби најкарактеристично за брендот е начинот на работа, односно постојаното надополнување на колекциите. Почнувам од една идеја која се развива во текот на целата сезона и изработувам десетина креации како основа, а потоа како резултат на побарувачката/продажбата во ателјето, таа се надополнува со нови уникатни парчиња, секое различно од претходните, но со карактеристики на тековната колекција. И така, наместо 20 парчиња во сезона се изработуваат најмалку по толку месечно. Тоа е креативно исцрпувачки, но мошне интересно и динамично, особено за клиентите кои постојано доаѓаат и наоѓаат нови интересни парчиња – вели Силвија.
Како дизајнер на модната сцена е присутна уште од 1999 година со завршна модна ревија на ФЛУ во Скопје, каде што се претставила со првата колекција White Light инспирирана од серијалот „Војна на ѕвездите“. Следат ревии на „Скопско лето“, а во 2000 година и самостојна ревија во рамките на „Модест“. По дипломирањето на ФЛУ (отсек сликарство и мода), работела како моден дизајнер во „Орка текстил“ за колекциите ККS Classic и Go со кои освои награда за дизајн „Сонце на годината“ во 2002 година. Соработувала и со неколку бутици сè до отварањето на ателјето „Алшар“ и создавањето на сопствен бренд. Учествувала и на манифестацијата „Чоколадна аукција“, а соработувала и со „Академија Леонтич“ на две ревии, Ultimate Black во Музеј на град Скопје (2010) и „Плавокапица“ во МНТ (2012)
-Моите идни планови се поврзани со поактивно учество на домашната модна сцена, претставување на колекција за пролет-лето на идниот „Моден викенд-Скопје“, како и проширување на асортиманот на производи во ателјето.
Нема коментари