Откака домашната модна сцена стана побогата за ушта едукативна дестинација, школата на Изет Цури во Скопје, оттаму веќе се појавуваат првите дизајнери кои прикажуваат колекции. На неодамна одржаните модни вечери токму студентите на Меѓународниот институт за мода Изет Цури имаа можност да се претстават со индивидуални ревии што во организација на Моден викенд-Скопје се случија на балконот на Музејот на современа уметност во Скопје. Модните вечери ги отвори модниот бренд „Мустела Ермин“ , зад кој стои дизајнерката Ира Алексовска. Со Ира зборувавме за нејзиниот почеток во модата, за новата колекција и првата ревија, за фотосесијата направена во Белград со Горан Поповски, а подолу ни отрки и што се крие зад името на брендот.
Ира бестрашно влегува во вртоглавиот круг на домашните дизајнерски прилики, бестрашно како жените бестрашни за кои креира мода, жени кои се соочуваат со препреки и ги надминуваат непоразени. „Жените на кои им е наменета мојата колекција имаат самодоверба и не се плашат да привлечат внимание во јавноста носејќи смел, секси, авангареден аутфит“, вели таа за колекцијата од 24 комбинации.
-Мојот интерес за модата беше присутен уште од најрана возраст и благодарение на модниот институт Изет Цури од пасија тоа премина во професија. Моето знаење и искуство стекнати во Институтот беа наградени со сертификат за стилизам и моделизам доделен од страна на Модната Федерација на Париз. Таму ја претставив својата прва капсулна колекција The Age of Confidence и воедно успеав да воспоставам контакт со одлични текстилни снабдувачи за понатамошна соработка.
Неодамна ја прикажа првата колекција на ревија во Музеј на современа уметност. Какви беа првите импресии и чувства, постоеше ли голема возбуда и мислиш ли дека на публиката ѝ се допадна она што го виде?
-Секако дека постоеше одредена доза на возбуда и страв, сепак ова е моја прва официјална колекција, а воедно и модна презентација. Јас сум навистина задоволна од тоа што успеав да го претставам на ревијата, со оглед на тоа и дека доста долго време работев на моделите. Судејќи по коментарите, можам да кажам дека и на публиката навистина ѝсе допадна тоа што го погледна.
Од што се состои твојата прва колеција?
-Во мојата колекција за пролет-лето 2016 преовладуваат потемните тонови како црната и темно сината боја. Со тоа сакам да се долови моментот на мистериозност, елегантност, па и доза на минимализам. Со минимализмот би ги поврзала и кроевите во кои се користени прави и чисти форми. Единствена боја која се издвојува е црвената, боја која е симбол на страста, впечатливоста и храброста. Тоа се всушност и карактеристиките што би ја опишале мојата идеална жена.
Твојот избор е посмела мода со доза на авангардност. Како ти самата ја опишуваш дизајнерската естетиката со која се претстави?
-Моите креации се наменети за смели и самоуверени жени, кои не се плашат да се изразат преку своите модни избори. Без разлика дали е тоа транспарентен фустан или асиметрични панталони, сметам дека храброста и самоувереноста кај една жена се најбитен сегмент за тие да бидат износени и претставени во јавноста како што треба. За жал во нашите простори сè уште постојат одредени норми кои ние би требале да ги следиме за тоа што е прифатливо да се носи. Би сакала сето тоа да се заборави и да има слобода за тоа кој како сака да се облекува, притоа да не се осети осудување од општеството.
Твојата работа ја потпишуваш под брендот „Мустела Ермин“. Што се крие зад името?
-Мустела Ермин е име кое го имав сретнато многу оддамна додека истражував за модата. Тоа е всушност вид на сибирска ласица, која во минатото била инспирација за изработка на луксузни парчиња облека на императорите.
За наобразба го избра школото на Изет Цури, зошто токму таму и што е она најзначајното што досега го научи?
-Го избрав Интернационалниот институт за мода Изет Цури, бидејќи со оглед на искуството на професорот знаев дека тоа е најдобриот избор за мене на овие простори. Тој безрезервно успева секојдневно да ни го пренесе своето долгогодишно знаење стекнато во едни од најдобрите светски париски модни куќи. Покрај моделизмот, кој ми овозможува да изработам креации направени по светски стандарди и кои совршено одговараат кога се изработени по мерка, тој се труди и да нè научи на трпеливост и истрајност кои се најпотребни доколку сакаме да постигнеме совршен производ.
Веројатно секој дизајнер впива идеи и референци од разни области, ликови, дизајнери… Каде ја црпиш ти инспирацијата?
-Како голем љубител на современата уметност и архитектурата, најчесто од таму ја црпам својата инспирација, користејќи прави и чисти форми комбинирани со транспарентни материјали.
Неодамна подготви фотосесија во Белград со фотографот Горан Поповски…
-Тоа беше една многу спонтана и прекрасна соработка од која сум исклучително задоволна од резултатот. За заштитно лице на кампањата беше избрана Невена Вуковиќ, девојка која е нова на модната сцена во Србија. Фотосесијата се случи низ улиците на Белград, обидувајќи се да ја преставиме „Мустела Ермин“ жената во една урбана средина.
Дали веќе почна да ги продаваш креациите, каде заинтересираните да те најдат?
-На мое огромно задоволство заинтересираноста за колекцијата после ревијата беше голема. За оние кои се заинтересирани и кои би сакале да го посетат моето студио во непосредна близина на Универзална сала, можат да ме контактираат на официјалните Facebook и Instagram страни на „Мустела Ермин“.
МУСТЕЛА ЕРМИН
Фото: Горан Поповски HLVK
Модел: Невена Вучковиќ
Нема коментари