Фото by FWSK
Младата дизајнерка Ирина Тошева последниве сезони предизвика големо внимание и стана препознатлива по колекциите со впечатливи шари и со младешки стил, како и по солидната продажба на онлајн-продавницата Bastet Noir, покажувајќи истовремено дека може да се создава домашна дизајнерска облека со достапни цени и дека нашата публика веќе почнува да купува мода на интернет. За престојното издание на Моден викенд-Скопје, за неа веќе петто претставување на манифестацијата, таа ни најави колекција за пролет-лето 2014 со која ќе не прошета во еден подзаборавен орман. На прв поглед, од работните фотографии направени за каталогот на FWSK, забележуваме женски и машки модели во ретро стил, ѕвонести панталони, принтови карактеристични за 60-тите и 70-тите години и ленонки како моден детаљ.
-Во подзаборавениот орман ќе најдете шарени памучни ткаенини, живост што пркоси, мирис на носталгија и една позната стара мелодија. Се инспирирав од старите фотографии од семејните албуми, каде пронајдов сведоштва на една бујна и шарена младост со свој моден печат – вели Ирина.
Во новата колекција ќе бидат застапени графички принтови на памучни ткаенини во жолта, сина, зелена и розова боја. Во однос на тоа колку нејзината линија се води од светските модни тенденции, ни откри дека водена од желбата да истражи нешто ново, како што често и’ се случува, колекцијата несвесно се поклопи со актуелните модни трендови. Модните парчињата што Тошева ќе ги претстави на FWSK се прилагодливи за сечиј вкус, колекцијата е наменета за сите млади и за оние кои се чувствуваат така, како и за сите оние кои сакаат да се потсетат на едно поинакво време.
-Ќе ја продолжам соработката со македонски креативци кои ќе работат на музичкото обликување на ревијата. Во духот на колекцијата движењето ќе биде послободно, а очекувањата секогаш се високи. Ова е мое петто претставување на Моден Викенд-Скопје и сигурна сум дека повторно ќе го прошири кругот на оние кои се запознаени со мојата работа – ни кажа Ирина за тоа како ја замислува идната ревија.
Ирина Тошева во финалето на ревијата за пролет-лето 2013 прикажана на FWSK
По Модниот Викенд колекцијата ќе биде претставена и во Виена на Balkan Fashion Emotion Days. По ревиските презентации ќе биде достапна за продажба во нејзиното ателје, како и онлајн насекаде во светот преку интернет продавницата за еко мода bastetnoir.com.
Во изминатиов период Ирина имаше неколку интересни дизајнерски проекти. Се радува на соработката со Младинскиот Културен Центар каде беше ангажирана во креирањето на костимите на мандолинскиот оркестар и женскиот хор. Соработуваше и со младата виолинистка Ева Богоевска, којашто ја претставуваше Македонија настапувајќи со оркестарот на Хо Ши Мин во Виетнам. Посебно е горда и на настанот „Дизајнирани прегратки“ преку кој успеа да вклучи македонски дизајнери и креативци во филантропска акција за уличниот магазин „Лице в лице“.
-Сè ова поставува високи цели за 2014 година во која како и секогаш ќе ја имам поддршката од мојот креативен тим, клиентите и секако медиумите.
Од колекцијата за есен-зима 2013/14
Нема коментари