Тринаесеттата по ред традиционална Годишна изложба на студентите од Факултетот за арт и дизајн ќе се отвори на 30 мај 2019, четврток, во 20.00 часот, во халата на старата печатница во објектот на Европски универзитет во Скопје (каде се одржа пролетниот Моден викенд Скопје). И овој пат, изложбата ќе ги претстави најдобрите дела и дизајн решенија кои произлегоа од практичните активности во изминатата академска 2018/19 година.
- И оваа година успешно се реализираа предвидените наставни активности, дополнети со работилници, модни ревии, посети на музеи и галерии, како и дружење со докажани гости – професионалци. Учествувавме на Модниот викенд Скопје со модната ревија „Ив Сен Лоран и јас”; учествувавме во работилницата Future Cities на UNDP; се претставивме на Младинскиот пролетен салон во Мала Станица; учествувавме во јавни конкурси, добивме Благодарница за учество во наградата за најдобри општествено одговорни практики во 2018 година за проектот „Дете и простор“; престојувавме во Словенија, Литванија, Италија, Германија, Полска и Црна Гора во рамки на програмите Еразмус+… сите овие активности нè инспирираа и нè мотивираа да бидеме подобри и уште покреативни – вели Гордана Вренцоска, декан на ФАД.
Инспирирани од силната светлина на револуционерната Баухаус школа, ФАД се придружува кон светската прослава на 100-те години од нејзиното основање со плакатот за изложбата во препознатливиот Баухаус стил и со други студентски дела.
Нема коментари