Во четврток, 2 јули, во 20 часот во Мала Станица ќе биде отворена изложба на современ накит насловена „Големата мајка божица и змејот“, а авторките на проектот Билјана Клекачкоска, македонска дизајнерка на накит која со современ авторски пристап твори во филигранска техника и Тина Кодер Грајзар, словенечка дизајнерка која авторски твори идриска чипка, ги поврзува сличниот пристап и концепт во работата како и сличниот начин на размислување. Како основен медиум и поле на изразување и двете избираат стари занаетчиски техники, органски поврзани со околината, поднебјето од кое доаѓаат.
Филигрански накит од Билјана Клекачкоска
Како појдовна точка на заедничкиот проект тие избираат по еден симбол од местата во кои живеат и творат – големата мајка божица од Скопје и љубљанскиот змеј. Сакајќи да додадат нова, актуелна димензија на овие два митoлошки симбола, Билјана ја замоли својата пријателка, писателката Барбара Драговиќ, специјално за оваа прилика да напише нов, современ мит кој ќе ги вклучува обата симболи. Така настана кратката приказна „Мајката божица и змејот”, која авторките на изложбата ја користат како појдовна точка и инспирација за заедничкото творење.
Идриска чипка како инспирација за дизајните на Тина Кодер Грајзер
Во презентираната колекција на накит уметниците го истражуваат дуалниот принцип (машко-женски, активно-пасивно, динамично-статично) како на ниво на форма, така и на ниво на материјал. Трагаат по точките на допир, спој од кој ќе произлезе нов производ со оптимална резонанца на двете техники и двата авторски начини на изразување.
Нема коментари