Францускиот институт во Скопје и галеријата „Акантус“ покануваат на отворањето на уметничката изложба „Париски сигнатури“, в петок, 16 март 2018, во 19 часот, гво скопската галерија „Акантус“. Изложбата содржи избор на дела на четиринаесет македонски уметници, реализирани по нивниот престој во Франција и во Уметничката резиденција во Париз. Изборот е на Марина Лешкова.
Изложбата се организира по повод прославата на Франкофонијата во Македонија и во рамките на одбележувањето на 25 години од воспоставувањето на дипломатски односи помеѓу двете земји. Истата ќе биде отворена за публиката до 20 април 2018.
„Поводот за оваа изложба, сам по себе е значаен и нуди можност да се обѕирнеме кон минатото кое ќе нè доведе до сегашноста и ќе понуди еден пресек или синтеза на значајни ликовни ракописи со автохтона ликовна исказност. Поставката на изложбата е составена од веќе одржани или тековни уметнички настани на македонските уметници, кои ни даваат можност за миг да ја почувствуваме и апсорбираме париската атмосфера, преку оптичката перцепција која се случила и повторно нè враќа во трезорот на културните богатства на различности и на дијалог со Франција која е доживеана како сопствен мит. Духот на Париз е пренесен во јавноста преку делата на уметниците кои не познаваат граници и кои го врежале своето богатство на неповторливост во времето и просторот“, смета Марина Лешкова.
Ќе бидат изложени дела од Борко Лазески, Миле Корубин, Боро Митриќески, Глигор Чемерски, Газанфер Бајрам, Илија Пенушлиски, Рубенс Корубин, Никола Иванов – Балтон, Росица Лазеска, Марина Лешкова, Дијана Томиќ Радевска, Симонида Филиповска Китановска, Пандора Апостолоска Саздовска и Сашо Саздовски.
„Многу ме радува оваа изложба. Таа нè потсетува дека пријателските врски помеѓу нашите две земји почиваат врз долга традиција каде што културната и уметничката размена зазема значајно место“, изјави Емануел Рембер, директор на Францускиот институт во Скопје.
Нема коментари