Минималистички, со едноставен крој и написи се маичките по кратки ракави што познатата македонска блогерка Јована Зука ги дизајнира во рамки на проектот „Jeansomania“ на „Фешн Груп Македонија“. Капсулната колекција ќе биде промовирана со инсталација на 5 април (недела) во рамки на пролетното издание на Моден викенд-Скопје, во катната гаража „Солунски конгрес“ . Деновиве Јована, која е авторка на модниот блог aftertwofive.com, во соработка со „Фешн Груп“, официјалните фотографи на Моден викенд - Ани и Дими и манекенката од модната агенција „Подиум“, Ангела Ѓорѓиева, снимија едиторијал со маичките. Во очекување на фотографиите споделуваме неколку кадри од снимањето, објавени на „Инстаграм“ профилот на Јована Зука.
-Соработката на проектот „Jeansomania“ беше иницирана од Јасмина Апостолоска, маркетинг менаџер во „Фешн Груп Македонија“. Со најголемо задоволство ја прифатив понудата да соработувам на овој проект кој опфаќа не само дизајн на колекција маички, туку и продукција на два едиторијали и изложба во склоп на претстојниот Моден викенд. Првиот едиторијал за претставување на колекцијата маички го завршивме викендов. Фотографиите ги изработија Ани и Дими, ни позираше Ангела Ѓорѓиева од модната агенција „Подиум“, за шминката и фризурата беше задолжен Игор Марков, а за стајлингот јас. Вториот едиторијал ќе го фотографира Жарко Чулиќ и истиот ќе биде објавен во априлското издание на Unique Magazine. Уживам во секој чекор од проектот и чест ми е што сум дел од истиот… Станува збор за мини колекцијата од шест бели маички со суптилна, но впечатлива црна типографија. Создадовме визуелно усогласени, но карактерно различни парчиња со натписи и игри на зборови кои на единствен начин ја одбележуваат темата „Jeansomania“. Сите натписи ги изработив јас, а визуелната реализацијата е на Бојан Тасевски, графички дизајнер во „Фешн Груп Македонија“-вели Јована Зука.
Ангела Ѓорѓиева од модната агенција „Подиум“ позираше во маичките со потпис на Зука
>>Од што црпеше инспирација за маиците, дали носат некоја посебна порака?
-Инспирацијата за маичките дојде од самото име на проектот – „манија“ за фармерки и облека изработена од џинс. Сакав да создадеме забавни парчиња кои ќе шират убава, позитивна енергија и насмевки насекаде, а кои истовремено ќе бидат весело-очигледен избор за комбинација со култната ткаенина-џинс.
>>Што ти беше најважно при дизајнирањето? Дали тоа се модели што и ти би ги носела?
-Би ги носела секој ден 
! Сакав да создадеме безвременски, секојдневно несекојдневни, удобни маички кои ќе можат да се носат секаде и секогаш во милион различни комбинации. Важно ми беше да направиме колекција во која секој ќе може да си избере омилена и карактерно најсоодветна маичка, а истовремено колекција која совршено ќе го долови концептот на „Jeansomania“.
>> Колкава ќе биде продукцијата на маичките и каде ќе може да се набават?
-„Jeansomania“ маичките се во ограничено количество и истите нема да одат во продажба. Колекција ќе биде изложена на последната вечер на претстојниот Моден викенд, а дел од маичките ќе бидат поделени меѓу посетителите. Се гледаме таму.
>>Во светски рамки веќе е пракса модните блогери, покрај тоа што се јавуваат како промотери на трендови или како заштитни лица на некои брендови, да добиваат ангажмани за дизајнирање на колекци. Дали соработката со „Фешн Груп Македонија“ ја доживуваш како правење чекор напред на овој план кај нас?
-Дефинитивно. Тимот на „Фешн Груп“ прави навистина голем чекор со прв проект од ваков размер во Македонија и неизмерно сум благодарна на дадената чест и доверба да работам како моден консултант и стилист на „Jeansomania“.
>>Изминатиов период си актуелна со објава на твои фотографии на сајтовите на светски познати магазини, поточно на веб-страниците на британски Vogue и на New York Magazine. Од какво значење се овие публикации за тебе, како македонски блогер?
-Не можам ни да опишам колку големо значење имаат такви објави за мене и за мојата работа. Истите не служат само како мотивација да продолжам и понатаму, туку и како совршен комплимент и показател дека не е важно каде сум, туку што создавам.
>> За релативно кусо време стана една од најпочитуваните и најпрепознатливите блогерки кај нас, често добиваш понуди за соработки и со наши дизајнери. Кој ангажман би го издвоила ?
-Ваков опис е чест за мене и ти благодарам. Секој ангажман е посебен на свој начин и не би можела да издвојам само еден, бидејќи без разлика дали е помал или поголем, ми овозможува да создадам нешто убаво, но и да учам, да напредувам, да созревам и најважно да продолжувам да ги остварувам своите идеи во процесот.
Нема коментари