Француската модна куќа „Луј Витон“ сега е сопственик на вториот најголем ископан дијамант во светот – необработениот и однадвор темен скапоцен камен наречен Sewelô. Пронајден во април 2019 година во рудникот Карове во Боцвана, дијамантот има 1.758 карати, тежи 353 грама и е со големина на безбол топка. Sewelô на локалниот јазик значи „редок пронајдок“.
Јувелирскиот свет се изненади што наместо кај вообичаените купувачи на дијаманти како компаниите за накит De Beers или Graff, скапоцениот камен отиде кај модниот бренд „Луј Витон“, препознатлив по дизајнерски чанти и облека.
Поранешниот претседател на берзата на дијаманти во Антверпен, Марсел Пруер, вели дека на светот постојат помалку од десет луѓе кои би знаеле што да прават со камен како овој и како да го пресечат, а и кои можат да го платат. Тој верува дека каменот Sewelô би можел да вреди околу 50 милиони долари, иако сè уште е во груба форма, така што неговиот квалитет е непознат.
Зад овој потег многу веројатно се крие стратегијата на „Луј Витон“ и групацијата LVMH (кој го поседува „Луј Витон“) да стане еден од петте светски најдобри играчи на пазарот на накит вреден 270 милијарди долари, да ја зацврсти позицијата на најлуксузна групација во светот и „Луј Витон“ да го направи највреден бренд.
Нема коментари