Првиот понеделник во мај во модниот календар е резервиран за Мет Гала, екстравагантна модна вечер која секоја година се организира по повод отворање на модна изложба во Институтот за костими при њујоршкиот музеј Метрополитен. Мет Гала секоја година го собира кремот на модната и забавната индустрија, а традиционалната изложба се осврнува на одредена тема.
Овој понеделник, 6 мај, е терминот за новата Мет Гала, оваа година на тема Camp: Notes on Fashion („Кемп: Белешки за модата“). Но, што е терминот кемп, што претставува кемп-естетика и како таа ќе се презентира велерва?
Терминот го обликува Сузан Сонтаг во 1964 одина во есејот „Белешки за кемп“, но познатата писателка и философка иако опширно пишува за кемп, сепак вели дека е навистина тешко прецизно да се дефинира. Наведува дека и самиот обид да се дефинира значи своеврсно предавство на самиот поим. Зборот кемп произлегува од францускиот se camper, што значи упадлив, пренагласен начин. Постојат и други идеи од каде потекнува зборот кемп, а во 20 век влегува во Оксфордскиот речник кој го дефинира како пренагласен, извештачен, феминизиран, хомосескуален.
Иаку навидум изгеда кичесто, кемп не е кич. За разлика од кичот, кепм не се базира на вкус, туку на стил. Тоа е сензибилитет. Иако е флуиден и елузивен, остана во употреба и се карактеризира со нагласена театралност, љубов кон артифициелното, преувеличување до степен на гротеска, извесна вулгарност, провокативност, нешто што е сосема неприродно (Сонтаг вели ништо во природата не може да биде кемп).
Модните познавачи кемп-естетиката ја следат од почетокот на минатиот век, преку стилот и појавата на Ме Вест, Џозефин Бејкер, Рудолф Валентино, Марлен Дитрих, потоа Мик Џегер, Дејвид Боуви, Роберт Смит од „Кјур“, Шер, Либерачи, Грејс Џонс, до денешните Ријана и Зендаја кои не се сосема кемп, но понекогаш се појавуваат во кемп-мода. Сонтаг кемп елементи наоѓа и во „Илијада“ и „Божествена комедија“, во комедиите на Аристофан, кај Рембрант, Сократ, Кафка, Рембо, а историски гледано го има во денди-стилот, во барокот и рококо стилот, кај Едвард VIII, Луј XIV, Оскар Вајлд, кај дизајнерката Елза Скјапарели, во ексцентичноста на Лас Вегас, а политички, кемп се тоталитаристичките диктатори.
Деновиве најавувајќи ја новата Мет Гала, во кемп-естетика е вклучен и фамозниот лебед-фустан на македонскиот дизајнер Марјан Пејоски, познат и по тоа што Бјорк го носеше на Оскарите. Во модна смисла кемп спојува иронија, фриволност, заиграност. Кемп е Скјапарели, Москино, Џереми Скот, Валтер Ван Берендонк, чии креации заедно со фустанот на Пејоски ќе бидат претставени на исложбата во Метрополитен. А Метрополитен музејот вечерва ќе биде домаќин на гала настанот, заедно со Vogue и уредничката Ана Винтур, а кодомаќини се Лејди Гага и дизајнерот Алесандро Микеле, кои мноу добро го илустрираат концептот на кемп. Во исчекување сме да погледнеме како модните личности и познатите ќе ја интерпретираат темата на црвениот килим.
Нема коментари