Министерството за култура по четврт пат објави конкурс за поддршка на проекти од доменот на креативните индустрии, а министерката Елизабета Канческа Милевска пред неколку дена ги соопшти резултати донесени од страна на стручната комисија во која членуваа Митко Хаџи-Пуља, Гордана Вренцоска, Роберт Јанкуловски, Андреј Бартлинг и Беким Мемети. Според изборот на комисијата министерството ќе поддржи 61 проект на индивидуални лица, граѓански здруженија и други правни субјекти, кои доаѓаат од различни области како на пример моден дизајн, дизајн на производ и на мебел.
-Развојот на современата култура, особено во доменот на применетите уметности и креативните практики, како и идентификацијата на економската, производствената и на профитабилната димензија на културата е еден од приоритетите на Министерството за култура кој е зацртан и во Националната стратегија за развој на културата 2013-2017 година. Токму затоа во изминатиот период наша цел беше имплементацијата на современите технологии и креативните индустрии во културата со кои настојувавме да поставиме повисоки стандарди на визуелна естетика, културна комуникација и да создадеме препознатливи македонски брендови. Сите мерки и активности кои ги презедоа Владата на Република Македонија и Министерството за култура на полето на креативните индустрии дадоа конкретни резултати и поттикнаа нови развојни и иновативни импулси во оваа област која се потврди како одличен медиум за промоција на знаењето и вештините на нашите креативци. Инвестирањето во развојот на креативните индустрии силно ги стимулираше македонските уметници и креативниот сектор кај нас, кој ја презентираше преку своите проекти имагинацијата и талентот, но креативните индустрии поттикнаа и голем број на нови вработувања, мобилност во економската размена и афирмација на претприемачкиот дух – изјави Канческа-Милевска на пресконференција што се одржа во центарот за дизајн и иновации „Јавна соба“.
На средбата со новинарите беа присутни членовите на комисијата Хаџи-Пуља, Вренцоска и Јанкуловски кои го нагласија едукативниот, културниот, промтивниот и економскиот аспект на проекти од применетите уметности и креативните индустрии . Дел од поддржаните автори открија за своите проекти, па така модната дизајнерка Ирина Тошева ќе работи на прва модна колекција со 3Д печатење во Македонија што ќе ја претстави на следниот Моден викенд-Скопје, Викторија Ланговска од креативното студио „Преплет“ зборуваше за применувањето на кирилицита и типичните македонски изрази во разни дизајнерски предмети, а Дејан Спасовиќ ќе работи на првиот македонски бренд за покуќнина наречен „Мираз“. Меѓу останатите поддржани проекти се „Визуелна приказна-мебел од Македонија“ (We and Nature), „Дизајн предизвик“ (Мима Пејоска), „Шајн“ („Тинк Мебел“), „Дигитална керамика (Александар Дудески), Дизајн пракса („Јавна соба“), „Отворени можности за креативните занаети“ (Занаетчиска комора – Скопје), како и проекти на здруженијата на граѓани наменети за лица со посебни потреби- „Види,слушни, погоди…“ (Здружение за општествена акција, едукација и превентива од Прилеп), Фестивалот на фигури од овошје и зеленчук „Сочни фигури 2016“ (Слоу фуд Свети Наум Охридски од Скопје) , „Сончева девојка“ (Едукативен центар Светлина од Прилеп) и други. (К.Т.)
•
Нема коментари