Италијанското модно дуо Доменико Долче и Стефано Габана повторно приредија спектакуларна ревија за нивната нова Alta Moda колекција за пролет 2017, што се одржа во Ла Скала, во хангарот на познатиот театар во Милано, кој беше трансформиран во декор кој како да е позајмен од филмскиот сет на „Убавицата и ѕверот“. Како што објаснува уредничката на Vogue UK, Александра Шулман, гостите на ревијата на Доче и Габана биле водени низ неколку работилници, за да стигнат во пространа просторија со илјадници запалени свеќи и илјадници рози, проследени од момчиња и девојки облечени во оперски костими. Таму гостите составени од клиенти, пријатели и мал број на модни уредници, ги очекуваша коктел забава пред да почне шоуто од околу сто комбинации и потоа вечера по самата ревија. Инаку, Alta Moda е синоним за париската Haute Couture (висока мода), која се презентира од страна на италијанските креатори во Рим или Милано.
Долче и Габана потоа го почнаа модниот театар полн со екстраваганција и вибрантност, бои и дезени, форми и разновидност. Колекцијата содржи раскошни везови и златни круни, екстравагантни тоалети со брокат и цветен принт, многу свила и кадифе, мотиви од разни опери, но и од кинески принцези и кралици од Тјудор-ерата. Следи серија на класични црни коктел фустани, џинс со богат вез и светкави камчиња, дополнето со впечатлив накит и драматични украси на глава. Како се појавува последниот дел од ревијата со фустани во боја на циклама, така излегуваат и Доменико и Стефано, да се поклонат и потоа продолжуваат да се дружат со гостите во публиката како завршница на модната ноќ во опера.
Нема коментари