Сè започнало со еден отпечаток на стапало во песок. Тој совршен непосреден контакт меѓу човекот и земјата. Англискиот дизајнер Џулијан Хејкс го разгледа внимателно начинот на кој тежината на стапалото се распределува кога стапнува во песок и го осмисли својот иновативен дизајн на чевли. Дипломата по архитектура од Кембриџ и повеќе од 12 годишното искуство со конструкција на згради и мостови ја дефинираат природната структурална естетика на дизајнот кој го имаат неговите чевли.
-Има поезија, ефикасна едноставност и елегантност во природата. Доколку нешто не служи со некоја цел, тогаш тоа не постои. Мојот пристап беше да се создадат чевли кои се свиваат околу природната форма на стапалото, а не форма во која стапалото треба да се принуди-вели тој.
Функционалниот дизајн кој заедно со технологијата на материјали превземена од светот на сноубордингот придонесуваат за интелигентно креативен шмек. „Тоа е една единствена извртена геометрија која започнува под прстите, го обвиткува лакот, продолжува надолу под петата пред да се превитка назад околу себе и да обезбеди потпора за петата“. Парче архитектура создадено за да го поддржи стапалото на високи потпетици.
Дизајнерот имаше причина моделот чевли да го нарече „мохито“. Тоа е име кое „ме потсети на извиткана кора од лимета и бидејќи мохитото е еден од моите омилени пијалаци, мислев дека е соодветно“. „Мохито“ чевлите, кои се производ од проект започнат уште во 2006 година, се создадени по стотици прототипи изработени рачно и со дигитален 3Д принт. Лансирани на пазарот со колекцијата пролет-лето 2013 веднаш наидоа на препознавање и постигнуваа успех, добивајќи ја и наградата на Vogue за најдобри модни додатоци за 2013, награда наменета за осознавање на талент, иновација и креативност во дизајнот на чевли. Хејкс исто така соработувал на проекти со компанијата „Марвел студиос“ на „Железен човек 3“ и „Тор: Темниот Свет“.
Денес „мохито“ чевлите се комерцијална реалност со продажна мрежа во повеќе од 17 држави која ги нуди трите различни линии – Класик, Металик/Мат и Лимитирана едиција. Огромниот успех е поткрепен со цена која произлегува од идејата на дизајнерот таа да се биде во разумни граници, според стратегија на „демократски кутур“. Архитектонската визија на Хејкс е насочена во насока повторно да изненади и вчудоневиди: „Развивам нова клач чанта, алки и очила за сонце. Планирам да ја истражам и облеката, па почекајте и видете!“
Нема коментари