Фотографиите се на NeuErotik, a модел е креаторката Милена Атанасова
Инспирирана од шумот, неговата појава и ефектот, креаторката од полско потекло, а со постојана адреса на живеење во Скопје, Катерина Микрут, ја создала новата колекција за сезоната есен-зима 2013/14. Дизајнерката препознатлива по своите плетени креации, која работи под етикетата Mikka Design, вечерва заедно со Катерина Попева (Hard to explain) ќе ги промовираат своите нови модели во Старата скопска чаршија. Со Микрут, која одлично знае македонски јазик, поразговаравме за инспирацијата и за спецификите на новата линија наречена „Шум“ (Noise), само неколку часа пред ревијата.
Катерина Микрут стои зад брендот Mikka design
-Шумот е добро позната појава, особено ако се потсетиме на постарата техника и уредите – телевизор и радио. Во сеќавањето ги имам непреспаните ноќи во очекување на некаков добар филм или слушањето на ноќните програми во радиото. Тоа беше време, сè уште без интернетот, кога за информацијата или друга содржина требаше да се почека. Измеѓу исчекувањето се појавуваше шум. Графичката „слика“ за шум се црно-бели ситни точки, ситно карирани форми, претежно во сиви нијанси на бои. Колекцијата е врзана со техничка појава и затоа има индустријален карактер. Затоа што во моето сеќавање шум останал како ноќна појава, така и колекцијата има малку „ноќен“ колорит-вели Микрут.
Во својата колекција ја применува графичката „слика“ за шумот, користејќи ја техниката на рачно плетење со повеќе бои- така да се постигне меланж на бои. Кај моделите доминираат бои на шумот- црна, сива во разни нијанси, темносина, темнозелена и бела. Избраните материјали го доловуваат шумот преку својот дезен. Тука спаѓаат разни волнени такенини со меланж, ситни карирани форми, сиви, црни пруги и сл. Со тие материјали како контраст доаѓаат црните и сребрените ткаенини кои го изразуваат индустријален карактер на колекцијата. Исто така ги преплетува и поголеми форми изведени од материјалите со различни дезени што симболизира премин од шум во слика, како што и други бои покрај овие типични за шум, што се појавуваат во колекцијата.
-Индустријалниот карактер на колекцијата е истакнат преку форми на облеката и додатоците. Ги користам едноставни, геометриски и минималистички облици на облеката. Врз нив е „насликан“ шум со горенаведените начини. Се појавуваат минималистички панталони, прави здолништа украсени со интересни детали. Џемперите претежно се во oversize облик. Палтата и блузите се украсени со различни испреплетени форми, но излегуваат од едноставни кројки-вели таа.
Колекцијата содржи претежно парчиња што можат да се најдат во секојдневна употреба, функионални и удобни за носење, истовремено лесно може да се искомбинираат со другите парчиња облека како од самата колекција така и воопшто.
- Колекцијата „Шум“ е наменета за жена толку уверена во својата женственост, што не мора да го истакнува преку облеката. Колекцијата ја крие женственоста- таа останува внатре во умот. Жената која сака да експериментира со модата, а истовремено си цени комфортна и удобна облека сигурно ќе се пронајде во „шумечките“ парчиња-вели таа на крајот.
Моделите ќе можат да се најдат во ателјето на Hard to explain во Старата скопска чаршија.
Нема коментари