Изложбената сезона во скопската галерија „Акантус“ стартува во петок, 14 февруари, со изложбата насловена „На работ/ On the Edge“, во која ќе учествуваат авторите Доротеј Нешовски, Илија Прокопиев, Ива Станковска и Ана Трајковска. Изложбата се отвора во 20 часот.
Во однос на темата и изборот за оваа изложба кураторката Дијана Томиќ Радевска ќе напише:
„Во светот на уметноста потребни се нови интриги и нови прашања. Тие можат да го појаснат ставот на уметникот, a ќе допринесат и за разбирање и уживање во уметноста. Ако интелектуалниот пристап на гледање и поимање, носи страв и непознаници, притоа барајќи едукативна подготвеност, така емотивниот контакт и чувства со уметничкото дело е уште позахтевен.
Уметноста како визуелен медиум ве вовлекува во процесот на создавање низ рацете на уметниците. Чинот на создавање на материјалната слика, „реалноста на насликаното“ (Хегел), создадена од човечката рака е израз на уметничката слобода, сето тоа на работ од реалноста и духовната „конструкција“, на работ на опсесијата, на работ на страста, на работ на бунтот, кон опстанокот на уметноста, … кон опстанокот.
Доротеј Нешовски, Илија Прокопиев, Ива Станковска и Ана Трајковска, блиски по третманот, секој на свој начин во традиционална техника, цртеж, сликарство, графички отпечаток, објект-скулптура, но на еден нетипичен начин излегуваат од рамката на ограничувања. Нивното искрено задоволство ќе се почувствува во предизвикот што го носи уметноста, на „лутањето“ низ сопствен јазик.
Тие се избор на галеријата „Акантус“ за почеток на годината. Уште на почетокот загатнуваме прашања и проблематики во исцрпените емотивни забелешки, уметниковите грижи, однос човек-град, човек-природа, човек-човек.“
Нема коментари