Инстаграм на својот блог претстави уште една новина и предизвика различни реакции на своите корисници. Имено, апликацијата која е лансирана пред шест години, неодамна ја надмина бројката од 500 милиони активни корисници од целиот свет кои ги следат новите функции, а најновата е именувана Instagram Stories и е неверојатно слична со Snapchat (Снепчет).
Покрај фотографиите и видеата кои можат да бидат објавени на профилот и да останат таму, сега корисникот може да снима кратка видео приказна која ќе исчезне во рок од 24 часа. Видео приказните ќе бидат поставени на врвот на вашиот news feed за да може лесно да се прегледа, но не може да се остава коментар или да се стави like (односно срце) на видеото. Личноста која го објавила видеото ќе може да следи кој сè го погледнал видеото и да менува дали видеото ќе биде целосно јавно или целосно скриено.
Покрај тоа што функцијата на привремена видео приказна речиси целосно е преземена од Снепчет, апликација која во изминатата година доживеа неверојатен раст, секое видео дополнително ќе може да го персонализирате со емотикони, цртежи и описи како што нуди и Снепчет. Реакциите на јавноста во моментов се поделени меѓу позитивни критики и негативни, па дури и извршниот директор на Инстарграм Кевин Систром ги припишува сите заслуги на Снепчет. Се поставуваат повеќе прашања, од тоа дали со оваа функција драстично се менува Инстаграм во однос на функцијата на споделување фотографии, до тоа колку е копија на друга апликација. Дотолку повеќе, што Марк Цукерберг, сопственикот на Инстаграм, во неколку наврати се обиде да го купи Снепчет.
Новата функција засега е достапна за дистрибуција на IOS и Андроид уредите само во САД, конечната оценка ќе биде дадена откако ќе биде достапна во целиот свет.
Нема коментари