Традиционалниот оскаровски ручек се одржува во деновите пред доделувањето на најпрестижната филмска награда Оскар и на кој се собираат оние што се номинирани. Меѓу холивудските ѕвезди номинирани годинава како Бред Пит, Шарлиз Терон, Леонардо ди Каприо и Рене Зелвегер, меѓу гостите беше и тимот на македонскиот документарец „Медена земја“ – режисерите Тамара Котевска и Љубо Стефанов, снимателите Самир Љума и Фејми Даут и продуцентот Атанас Георгиев.
Тамара меѓу Леонардо ди Каприо и Грета Гервиг за време на снимањето на групната фотографија
Младата режисерката Тамара ја забележавме на групната фотографија во првиот ред помеѓу Леонардо ди Каприо и режисерката и актерка Грета Гервиг, а утрово позната модна креаторка Тања Кокев откри дека е облечена во сива креација со нејзин потпис. Кокев веќе некое време се грижи за изгледот на филмаџиите на нивните појавувања на разните доделувања на награди и појавувања на филмски настани, а Тамара често бира македонски дизајн и неодамна во Лос Анџелес носеше црвена креација на „Алшаер“.
Тања Кокев исто така најави дека веќе работи на креација за Атиџе Муратова, хероината од филмот „Медена земја“, која се очекува да се појави на доделувањето на Оскарите на 9 февруари.
„Медена земја“ на овогодинешните Оскари е номиниран во две категории – за најдобар документарен филм и за најдобар странски филм. На оскаровскиот ручек нашите филмаџии се дружеа и фотографираа со големите холивудски ѕвезди од калиброт на Бред Пит, Роберт де Ниро и Квентин Тарантино.
Филмската екипа со Бред Пит
Групна фотографија на номинираните за Оскар 2020
НА настанот со Ал Пачино, Роберт де Ниро и Квентин Тарантино
„Медена земја“ рамо до рамо до Шарлиз Терон, Бред Пит, Рене Зелвегер, Роберт де Ниро и Леонардо ди Каприо
Нема коментари