Помеѓу трендовите од модната писта и оние забележани кај ѕвездите на уличната мода, впечатливи се и стајлинзите на славните дами кои секогаш прават исчекор од вообичаените комбинации и наметнуваат сосема необичен стил. За време на одржувањето на модната недела во Париз будно ги следиме тие необичн, но неодоливи стајлинзи, особено оние на трендсетерката Оливија Палермо. Таа на пример, на ревијата на „Валентино“ се појави во еклектична комбинација – црно здолниште од тантела украсено крупни цветови, ананаси и папагали, потоа тенок џемпер со линии и со спуштени рамена, и детали како ремен, чанта и сандали во различни бои. Ретко кој може да облече толку распар комбинација и да ја носи со таква леснотија, без да изгледа нескладно и како жртва на модата.
На ревијата кај „Валентино“, впечатлива беше и Џесика Алба која прикажа нов начин како се носи транспарентно здолниште низ овој храбар стајлинг – преку долга кошула со машки крој и со проширени ракави. Важно е здолништето да е сосема проѕирно, но наместо да се стави во вулгалерн контекст, се носи врз долга кошула која покрива дел од телото. Целиот изглед е комплетиран со црна чанта, чевли до глужд, брановидна фризура и усни нагласени со црвена боја.
Уште една модна ѕвезди кај „Валентино“ прикажа смел стајлинг. Поранешната манекенка, сега актерка Дајан Кругер избра фармерки, парче облека што порано беше незамисливо да се види на ревија на некоја луксузна модна куќа. Кругер е една од жените што ретко прави грешка во однос на облеката, таа смело комбинира неспоиви парчиња, а овојпат фармерките со порелаксиран крој и завртени ногавици ги спои со бела тантелна блуза и со крзнена кратка јакна со цветни апликации, и финишира со плик чанта од кадифе и црни сандали. Сите три дами покажаа смели, необични комбинации во кои вметнаа ризични моменти, но со позитивен ефект.
Нема коментари