Таа е стилистка, блогерка инфлуенсерка, модна уредничка, основач на сајтот Social Zoo, ѕвезда на уличната мода и промотерка на скандинавскиот стил, Пернил Тајсбек сега е и „Манго“ девојка. Пернил се појавува во новиот едиторијал од серијалот на шпанскиот моден бренд со познати модни инсајдерки, и сними фотосесија и видео во родниот Копенхаген облечена во креации на „Манго“.
Во модната сторија Еден ден со Пернил во Копенхаген, оваа #mangogirl преку моделите на „Манго“ го открива својот минималистички и edgy стил, раскажува дека страста за модата ја открила како дете, а инспирација наоѓала претурајќи по гардеробата на својата баба.
-Скандинавскиот стил за мене е нешто класично со некој необичен пресврт. Нов накит, „фанки“ чевли, супер чанта, тоа се елементите што стилот го прават личен и интересен – вели Пернил.
Пернил често патува, ги посетува модните недели, сака да оди по музеи, уметнички галерии и салони за мебел, ужива кога среќава нови луѓе и ја слуша нивната модна инспирација… но, најудобно се чувствува во својот дом во Фредериксберг, мирен станбен дел од Копенхаген.
Домот за неа претставува светилиште на енергија, во видеото може да го забележиме миналистичкиот и ненаметлив стил во нејзиниот стан, а Пернил открива дека го цени данскиот дизајн и обожава да собира столици.
Како би изгледал еден совршен ден со оваа „Манго“ девојка?! Откако би го одвела синот во градинка, би го посетила омиленото локално кафуле, а потоа би отишла во музеј и би вдишала со полни гради. Без двоумење би поминала некое време сама, и би барала инспирација во секојдневните ситуации.
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари